மரவள்ளிக்கிழங்கின் கொள்முதல் விலை வீழ்ச்சியடைந்து வருவதால் விவசாயிகளை பாதுகாக்க டன்னுக்கு ரூ. 8 ஆயிரம் விலை நிா்ணயம் செய்யவேண்டும் என கோரிக்கை விடுக்கப்பட்டுள்ளது.
இதுகுறித்து, தமிழ்நாடு குறு, சிறு விவசாயிகள் சங்க மாநிலத் தலைவா் கே.ஆா்.சுதந்திரராசு, தமிழக முதல்வருக்கு அனுப்பிய கோரிக்கை மனு விவரம்: தமிழ்நாட்டில் ஈரோடு, நாமக்கல், சேலம், கள்ளக்குறிச்சி மாவட்டங்களில் அதிக அளவில் மானாவாரிப் பயிராகவும், நீா்தெளிப்பு சாகுபடி முறை மூலமாகவும் மரவள்ளிக்கிழங்கு பயிரிடப்பட்டுள்ளது. டிசம்பா் முதல் மாா்ச் வரை இதன் அறுவடை காலமாகும்.
தற்போது ஒரு ஏக்கரில் சராரியாக 10 முதல் 12 டன் வரை மகசூல் கிடைக்கிறது. இதற்கு 1 ஏக்கருக்கு ரூ.70 முதல் ரூ.80 ஆயிரம் வரை சாகுபடி செலவாகிறது. தற்போது, மரவள்ளிக்கிழங்கு விலை கடுமையாக வீழ்ச்சியடைத்து ஒரு டன் கிழங்கு ரூ. 5,000 முதல் ரூ.5,700 வரை மட்டுமே கொள்முதல் செய்யப்படுகிறது.
இதனால் விவசாயிகளுக்கு ஏக்கருக்கு ரூ.25 ஆயிரம் முதல் ரூ.30 ஆயிரம் வரை இழப்பு ஏற்பட்டு வருகிறது. ஈரோடு, சேலம், நாமக்கல், கள்ளக்குறிச்சி மாவட்ட ஆட்சியா்கள் ஒன்றிணைந்து ஆலோசனை செய்து மரவள்ளிக்கிழங்கு விவசாயிகளுக்கு உரிய விலை கிடைக்க நடவடிக்கை எடுக்க வேண்டும்.
எனவே விலை வீழ்ச்சியைக் கட்டுபடுத்தி விவசாயிகளை பாதுகாத்திட மரவள்ளிக்கிழங்கு விலை குறைந்தபட்சம் டன்னுக்கு ரூ.8 ஆயிரம் என விலை நிா்ணயம் செய்ய வேண்டும். மேலும் வரும் காலங்களில் மரவள்ளிக்கிழங்குக்கு உரிய விலை கிடைக்கவும், ஏற்றுமதியை ஊக்குவிக்கவும் மரவள்ளிக்கிழங்குக்கு என வாரியம் அமைக்க வேண்டும் என தெரிவிக்கப்பட்டுள்ளது.
