பேருந்தில் கஞ்சா கடத்திய இளைஞா் கைது

பேருந்தில் 8 கிலோ கஞ்சாவை கடத்திய நபரை போலீஸாா் கைது செய்தனா்.

மதுரையில் கஞ்சா வைத்திருந்த ஒருவரை அந்த மாவட்ட போலீஸாா் அண்மையில் கைது செய்தனா். அவருடைய கைப்பேசி எண்ணுக்கு அடிக்கடி ஒரு குறிப்பிட்ட எண்ணில் இருந்து அழைப்பு வந்தது. இதனால் அந்த எண்ணை போலீஸாா் கண்காணித்தனா்.

அப்போது, அந்த எண்ணை பயன்படுத்துபவா் ஈரோடு மாவட்டத்தில் இருப்பதாக தெரியவந்தது. இதைத்தொடா்ந்து ஈரோடு மாவட்ட மதுவிலக்கு அமலாக்கப் பிரிவுக்கு தகவல் தெரிவித்தனா்.

அதன்பேரில், டிஎஸ்பி சண்முகம் தலைமையிலான போலீஸாா் தீவிரமாக கண்காணித்தனா். அப்போது அந்த கைப்பேசி எண் பெருந்துறை அருகே உள்ள விஜயமங்கலம் பகுதியில் பயன்பாட்டில் இருப்பது தெரியவந்தது.

இதைத் தொடா்ந்து விஜயமங்கலம் சோதனை சாவடி பகுதியில் போலீஸாா் புதன்கிழமை தீவிர வாகன சோதனையில் ஈடுபட்டனா். அப்போது, அந்த வழியாக வந்த பேருந்தில் சோதனை நடத்தினா்.

அப்போது, அதில் பயணம் செய்த ஒருவரிடம் 8 கிலோ கஞ்சா இருப்பது கண்டுபிடிக்கப்பட்டது. இதைத் தொடா்ந்து போலீஸாா் அவரைப் பிடித்து விசாரணை நடத்தினா்.

விசாரணையில் அவா் கோவை, கணபதி பகுதியைச் சோ்ந்த முத்துகணேஷ் (27) என்பதும், அவா் ஒடிஸா மாநிலத்தில் இருந்து கஞ்சாவை வாங்கி அதை ரயில் மூலம் ஈரோட்டுக்கு கொண்டு வந்து, பின்னா் அங்கிருந்து பெருந்துறை சிப்காட் பகுதிக்கு விற்பனைக்கு கொண்டு சென்றதும் தெரியவந்தது.

இதைத்தொடா்ந்து போலீஸாா் வழக்குப் பதிவு செய்து முத்துகணேசை கைது செய்தனா். மேலும் அவரிடம் இருந்து 8 கிலோ கஞ்சாவை பறிமுதல் செய்தனா்.