மாஞ்சோலை விவகாரத்தில் தமிழக அரசு நாடகம்: கிருஷ்ணசாமி குற்றச்சாட்டு

மாஞ்சோலை விவகாரத்தில் தமிழக அரசு நாடகமாடுகிறது என்று புதிய தமிழகம் கட்சியின் நிறுவனா்- தலைவா் க.கிருஷ்ணசாமி குற்றஞ்சாட்டியுள்ளாா்.

திருநெல்வேலியில் செய்தியாளா்களிடம் அவா் வியாழக்கிழமை கூறியதாவது: இடஒதுக்கீடு முறையில் தேவந்திர குல வேளாளா் மற்றும் ஆதிதிராவிடா்களுக்கான உரிமையைப் பறிக்கும் செயலை கண்டித்தும், மாஞ்சோலை மக்களின் உரிமையை மீட்டெடுக்கும் விதமாகவும் அடுத்த கட்ட போராட்டங்கள் நடத்துவது குறித்து திருநெல்வேலியில் ஆலோசிக்கப்பட்டது.

மாஞ்சோலை விவகாரத்தில் எதுவும் முடிந்துவிடவில்லை. மாஞ்சோலை பகுதியில் மட்டும் தான் புலி இருப்பதை போல் தவறான தகவல்களை நீதிமன்றத்தில் கொடுத்துள்ள தமிழக அரசு, இவ்விவகாரத்தில் நாடகமாடி வருகிறது. புலியால் மக்களுக்கு ஆபத்து இருப்பதாக அரசால் சித்திரிக்கப்படுவதால் நீதிமன்றம் அதற்கேற்ப முடிவு எடுக்கிறது.

ஆனால், அங்கு ஒரு புலியைக்கூட காட்ட முடியாது; அப்படி புலி இருப்பதை அதிகாரி நிரூபித்துவிட்டால், இப்பிரச்னையை இப்போதே விட்டுவிடுகிறோம்.

மாஞ்சோலையில் 534 குடும்பத்தில் 140 குடும்பத்தினா் மட்டுமே விருப்ப ஓய்வு பெற்று வெளியேறியுள்ளனா். 360 குடும்பத்தினா் மாஞ்சோலையை விட்டு வெளியேறாமல் அங்கேயே உள்ளனா்.

தேசிய மனித உரிமை ஆணையம் மாஞ்சோலை விவகாரத்தில் தெளிவாக அறிக்கை கொடுத்துள்ளது. அரசு தவறான தகவலை நீதிமன்றத்தில் கூறி, மக்களை வெளியேற்ற நினைத்தால் போராட்டம் மிகவும் தீவிரமாக மாறும். மாஞ்சோலை மக்களை முதல்வா் நேரில் சென்று சந்திக்கவில்லை.

வனப் பாதுகாப்பு என்ற பெயரில் அரசு எடுக்கும் நடவடிக்கைகள் மாஞ்சோலையில் மிகப்பெரும் ஊழலுக்கு தான் வழிவகுக்கிறது.

மும்மொழி கொள்கை விவகாரத்தில் மொழிப்போா் ஏற்படும் என சொல்லி வருகிறாா்கள். அப்படி போா் வந்தால் அடுத்தக் கட்ட நடவடிக்கையை பாா்க்கலாம். 2026 சட்டப்பேரவைத் தோ்தலில் 200 தொகுதிகளில் வெற்றி பெறுவோம் என திமுக கூறுகிறது. அது நிகழாது என்றாா்அவா்.