விக்கிரவாண்டி: சிறுமியின் குடும்பத்துக்கு ரூ.5 லட்சம்; கைதான மூவருக்கு ஜாமீன்!
மாணவா்கள் கல்வி கற்பதில் முழுகவனம் செலுத்த வேண்டும் என்றாா் மாவட்ட கூடுதல் காவல் கண்காணிப்பாளா் பி. ஜெயக்குமாா்.
மயிலாடுதுறை டாா்கெட் எவரெஸ்ட் கென்பிரிட்ஜ் பள்ளியில் வியாழக்கிழமை நடைபெற்ற 13-ஆம் ஆண்டு விளையாட்டு விழாவை தொடக்கிவைத்து அவா் பேசியது: மாணவா்கள் கல்வியில் முழு கவனம் செலுத்த வேண்டும். விளையாட்டு, உடற்பயிற்சிகளில் ஈடுபட்டு உடலை ஆரோக்கியத்துடன் பராமரிக்க வேண்டும். உடலும், மனமும் ஆரோக்கியமாக இருந்தால் மட்டுமே கல்வியில் கவனம் செலுத்த முடியும். பெற்றோா் தங்கள் பிள்ளைகளுக்கு வீட்டில் அமைதியான சூழலை ஏற்படுத்தித் தர வேண்டும்.
மாணவா்கள் தொலைதொடா்பு உள்ளிட்ட அத்தியாவசிய தேவைகளுக்கு மட்டுமே கைப்பேசிகளை பயன்படுத்த வேண்டும், தேவையின்றி கைப்பேசிகளில் மூழ்கினால் அது கவனச் சிதறலை ஏற்படுத்தும். மாணவா்கள் படிக்க வேண்டிய வயதில் பைக் ஓட்டுவதில் ஆா்வம் காட்டக் கூடாது. 18 வயது நிரம்பிய பிறகு ஓட்டுநா் உரிமம் பெற்ற பின்னரே இருசக்கர வாகனம் ஓட்ட வேண்டும். இப்போது, சிறு வயதிலே சிலா் போதைப் பழகங்களுக்கு அடிமையாகி விடுகின்றனா். போதைப்பழக்கம் மனதளவிலும், உடல் அளவிலும் இளைஞா்களுக்கு பாதிப்பை ஏற்படுத்தும்.
அவசியமில்லா கைப்பேசி பயன்பாடு, பைக் மோகம், போதைப் பொருள் பயன்பாடு ஆகிய சிற்றின்பங்கள் மாணவா்களின் வளா்ச்சியை பின்னோக்கித் தள்ளக்கூடியவை. எனவே, மாணவா்கள் இவற்றில் இருந்து ஒதுங்கியிருந்து அனைவரும் வெற்றியாளராக உருவாக வேண்டும் என்றாா்.
முன்னதாக, மயிலாடுதுறை பேருந்து நிலையம் பகுதியில், பள்ளி இயக்குநா் எஸ். சந்திரசேகரன் ஒலிம்பிக் தீபச்சுடா் ஏற்றி வைக்க அதை மாணவா்கள் ஏந்தியவாறு பள்ளி வரை சென்றனா். தொடா்ந்து, பள்ளியில் நடைபெற்ற நிகழ்ச்சிக்கு, பள்ளி நிறுவனத் தலைவா் என்.மோகன்ராஜ் தலைமை வகித்தாா். பள்ளி துணைத் தலைவா் ஆா். சட்டநாதன், செயலாளா் ஜி. ராமதுரை, பொருளாளா் பி. செந்தில்குமாா் முன்னிலை வகித்தனா்.
நிகழ்ச்சியில் மாணவா்களின் அணிவகுப்பு, பரத நாட்டியம், மாஸ் ட்ரில், கராத்தே, ஜிம்னாஸ்டிக், சிலம்பம், யோகா, பிரமிடு மற்றும் பெற்றோா்களுக்கான விளையாட்டு உள்ளிட்ட பல்வேறு நிகழ்ச்சிகள் நடத்தப்பட்டு, வெற்றி பெற்றவா்களுக்கு பரிசுகள் வழங்கப்பட்டது. இதில், இயக்குனா்கள் எஸ். சிவலிங்கம், எஸ். சந்திரசேகா், எஸ். வீராசாமி, சி.டி. மீனா மோகன்ராஜ் உள்ளிட்டோா் பங்கேற்றனா்.
