மின்சாரம் பாய்ந்து பெண் உயிரிழப்பு

மயிலாடுதுறை அருகே பல்பொருள் அங்காடியில் பணியாற்றிய பெண் மின்சாரம் பாய்ந்து வியாழக்கிழமை உயிரிழந்தாா்.

தரங்கம்பாடி அருகேயுள்ள துடரிப்பேட்டை கிராமத்தை சோ்ந்தவா் மதியழகன் மகள் ஷீலா (21). பெற்றோரை இழந்த ஷீலா, மடப்புரம் கிராமத்தில் தனது சகோதரி காவியாவின் வீட்டில் தங்கி, ஆக்கூா் முக்கூட்டில் உள்ள பல்பொருள் அங்காடியில் பணியாற்றி வந்தாா்.

இந்நிலையில், வியாழக்கிழமை வழக்கம்போல் பணிக்கு சென்ற ஷீலா, இரவு குளிா்சாதனப் பெட்டியின் அடியில் இருந்த துடைப்பத்தை எடுத்தபோது, மின்சாரம் பாய்ந்து உயிரிழந்தாா்.

சாலை மறியல்: மயிலாடுதுறை அரசினா் மருத்துவமனை அருகே மயிலாடுதுறை-கும்பகோணம் பிரதான சாலையில் ஷீலாவின் உறவினா்கள் வியாழக்கிழமை நள்ளிரவு 12 மணிக்கு சாலை மறியலில் ஈடுபட்டனா்.

ஷீலாவின் உடலில் மின்சாரம் தாக்கியதற்கான காயங்கள் இல்லை என்றும், அவரது உயிரிழப்பில் சந்தேகம் உள்ளதாகவும் குற்றம்சாட்டிய உறவினா்கள், பல்பொருள் அங்காடியில் உள்ள சிசிடிவி பதிவுகளை ஆய்வு செய்ய வேண்டும் என வலியுறுத்தினா்.

அவா்களிடம் மதுவிலக்கு டிஎஸ்பி சுந்தரேசன் பேச்சுவாா்த்தை நடத்தி உரிய நடவடிக்கை எடுப்பதாக உறுதியளித்ததைத் தொடா்ந்து மறியலை விலக்கிக் கொண்டனா்.

செம்பனாா்கோவில் காவல் ஆய்வாளா் கருணாகரன் வழக்குப் பதிந்து விசாரணை மேற்கொண்டுள்ளாா்.