மீன்பிடி தடைக்காலம் இன்று நள்ளிரவுடன் முடிவடைகிறது: கடலுக்குச் செல்லத் தயாராகும் மீனவா்கள்

வங்கக் கடல் பகுதியில் விசைப் படகுகள் மூலம் மீன் பிடிக்க விதிக்கப்பட்ட 61 நாள்கள் தடைக்காலம் சனிக்கிழமை (ஜூன் 14) நள்ளிரவுடன் முடிவடைவதையொட்டி சென்னை காசிமேடு மீன்பிடித் துறைமுக மீனவா்கள் உள்ளிட்ட தமிழகம் முழுவதும் உள்ள விசைப்படகு மீனவா்கள் உற்சாகத்துடன் கடலுக்குச் செல்லத் தயாராகி வருகின்றனா்.

மீன்கள் இனப்பெருக்கத்தை கருத்தில் கொண்டு வங்கக் கடலில் ஆண்டுதோறும் ஏப்.15 முதல் ஜூன் 14-ஆம் தேதி வரை 61 நாள்களுக்கு மீன்பிடிக்க தடைக்காலம் அமல்படுத்தப்படும். நிகழாண்டும் தடைக்காலம் கடந்த ஏப்.15-ஆம் தேதி தொடங்கியது. இந்தத் தடைக்காலம் சனிக்கிழமை (ஜூன் 14) நள்ளிரவுடன் நிறைவடைவதையொட்டி, தமிழகம் முழுவதும் மீனவா்கள் உற்சாகத்துடன் கடலுக்குச் செல்லத் தயாராகி வருகின்றனா்.

தயாா் நிலையில் விசைப்படகுகள்: சென்னை காசிமேடு துறைமுகத்தில் மட்டும் சுமாா் 800 விசைப்படகுகள் உள்ளன. தடைக்காலத்தையொட்டி விசைப்படகுகளை பழுது நீக்கி புதுப்பிக்கும் பணிகள் கடந்த இரு மாதங்களாக நடைபெற்று வந்தன.

இந்த நிலையில், கடலுக்குச் செல்லும் விசைப்படகுகளில் ஐஸ்கட்டிகள், டீசல் நிரப்பும் பணி தொடா்ந்து நடைபெற்று வருகிறது. மேலும், ஒரு வார பயணத்திற்கான மளிகை சாமான்கள், உணவுப் பொருள்கள், சமையல் பாத்திரங்கள், எரிவாயு சிலிண்டா்கள் உள்ளிட்ட அனைத்து பொருள்களையும் வாங்கி படகுகளில் ஏற்றும் பணிகளும் தொடா்ந்து நடைபெற்று வருகின்றன.

மீன் விலை குறையுமா? சனிக்கிழமை நள்ளிரவு முதல் கடலுக்குச் செல்லும் விசைப்படகுகளின் எண்ணிக்கை படிப்படியாக அதிகரிக்கும். முதல் நாளில் சுமாா் 200 விசைப் படகுகள் கடலுக்குச் செல்கிறன. இவா்கள் குறைந்தபட்சம் 5 முதல் 15 நாள்கள் வரை கடலில் மீன்பிடித்து விட்டு பிடிபடும் மீன்களின் அளவுக்கு ஏற்ப படிப்படியாக கரை திரும்புவாா்கள். வஞ்சிரம், வவ்வால், சங்கரா, ஊழா, நண்டு, இறால் உள்ளிட்டவை பெரும்பாலும் விசைப்படகுகள் மூலம்தான் கிடைக்கின்றன. எனவே, இன்னும் ஒரு வாரத்துக்குள் மீன்வரத்து அதிகரித்து படிப்படியாக மீன் விலை குறையும் என்று எதிா்ப்பாா்க்கப்படுகிறது.

சூறாவளிக் காற்று: மீன்பிடித் தடைக்காலம் முடிவடைந்து மீண்டும் கடலுக்குச் செல்லும் மீனவா்களுக்குத் தேவையான அனைத்து வசதிகளையும் மீன்வளத் துறை செய்து வருகிறது. இந்த நிலையில் வெள்ளிக்கிழமை முதல் முதல் 17-ஆம் தேதி வரை தமிழகம் மற்றும் ஆந்திர மாநிலங்களின் கடலோர பகுதிகளில் மணிக்கு 45 முதல் 55 கி.மீ. வேகத்தில் பலத்த சூறாவளிக் காற்று வீசக்கூடும் சென்னை வானிலை ஆய்வு மையம் தெரிவித்துள்ளதால் மீனவா்கள் கடலுக்குச் செல்ல வேண்டாம் என காசிமேடு மீன்பிடித் துறைமுக மீன் வளத் துறை உதவி இயக்குநா் ப.திருநாகேஸ்வரன் எச்சரிக்கை விடுத்துள்ளனா்.