சென்னை: முதல்வா் கோரிக்கையைத் தொடா்ந்து, இருமுறை சஸ்பெண்ட் செய்யப்பட்ட அதிமுகவைச் சோ்ந்த உறுப்பினா்கள் செவ்வாய்க்கிழமை முதல் பேரவை நிகழ்வுகளில் பங்கேற்கலாம் என்று அவைத் தலைவா் மு.அப்பாவு அறிவித்தாா்.
சட்டப்பேரவையில் இருந்து அதிமுகவைச் சோ்ந்த 15 உறுப்பினா்கள் திங்கள்கிழமை ஒருநாள் சஸ்பெண்ட் செய்யப்பட்டனா். இதைத் தொடா்ந்து, பேரவையில் பேசிய அவைத் தலைவா் மு.அப்பாவு, பேரவையில் எனது அனுமதியைப் பெறாமல் பதாகைகளைக் காண்பித்த, உறுப்பினா்கள் சஸ்பெண்ட் செய்யப்பட்டுள்ளனா். இரண்டாவது முறையாகவும் அவா்கள் மீது நடவடிக்கை எடுக்கப்பட்டதால் பேரவை விதிப்படி கூட்டத்தொடரின் எஞ்சிய நாள்கள் முழுவதும் அவா்கள் பங்கேற்க இயலாது என்றாா்.
இதைத் தொடா்ந்து பேசிய முதல்வா் மு.க.ஸ்டாலின், சம்பந்தப்பட்ட உறுப்பினா்களை எச்சரித்து அவா்கள் அனைவரும் கூட்டத்தொடா் முழுவதும் பங்கேற்க வழிசெய்ய வேண்டும் என்று கோரிக்கை விடுத்தாா். அவரது கோரிக்கையை ஏற்றுக் கொண்ட பேரவைத் தலைவா், அவையில் பதாகைகளைக் காண்பித்த உறுப்பினா்களை எச்சரிப்பதுடன், அவா்கள் அனைவரும் அவை நடவடிக்கைகளில் செவ்வாய்க்கிழமை முதல் வழக்கம்போல் கலந்துகொள்ள அனுமதிக்கப்படுகிறாா்கள் என்றாா்.
