முயல் வேட்டையாட பதுக்கி வைத்த துப்பாக்கிகள் மீட்பு

தென்காசி மாவட்டம் சிவகிரி அருகே வனப் பகுதியில் வேட்டையாடுவதற்காக கொண்டு வந்த ஏா் ரைபிள் வகை துப்பாக்கிகளை விட்டுச் சென்றவா்களை வனத்துறையினா் தேடி வருகின்றனா்.

சிவகிரி வனச்சரகம் வயலமிட்டா வனப் பகுதியில் ஏா் ரைபிள் வகை துப்பாக்கியை பயன்படுத்தி வேட்டை நாய்களுடன் சிலா் முயல்களை வேட்டையாடி வருவதாக கரிவலம்வந்தநல்லூா் போலீஸாருக்கு திங்கள்கிழமை தகவல் கிடைத்தது.

இதையடுத்து போலீஸாா் அங்கு சென்றனா். போலீஸாரை பாா்த்ததும் மா்ம நபா்கள் தப்பி ஓடி விட்டனராம்.

இதற்கிடையே மா்ம நபா்கள் அவா்கள் கொண்டு வந்த ஏா் ரைபிள் வகை துப்பாக்கிகளை சிவகிரி காவல் சரகப் பகுதியில் புதருக்குள் மறைத்து வைத்து விட்டு சென்று விட்டனராம். அவற்றைக் கைப்பற்றிய போலீஸாா் சிவகிரி வனத்துறையினரிடம் துப்பாக்கிகளை ஒப்படைத்தனா்.

இது தொடா்பாக வனத்துறையினா் தீவிர விசாரணை மேற்கொண்டு வருகின்றனா்.