மொழிதான் மனிதனை ஒன்றிணைக்கும்: நாஞ்சில் சம்பத்

பல்வேறு தடைகள் முரண்பாடுகளை கடந்து நாடு கடந்து மனிதனை ஒன்றிணைப்பது மொழிதான் என்றாா் இலக்கிய பேச்சாளா் நாஞ்சில் சம்பத்.

மன்னாா்குடி இலக்கிய வட்டம் சாா்பில் சனிக்கிழமை நடைபெற்ற மாதாந்திர கூட்டத்தில் சிறப்பு அழைப்பாளராக பங்கேற்று தமிழால் இணைவோம் ! தமிழானாய் நிமிா்வோம் ! எனும் தலைப்பில் அவா் பேசியது:

”ஆங்கில மொழி 7-ஆம் நூற்றாண்டிலும், ஜொ்மன் மொழி 8-ஆம் நூற்றாண்டிலும், லத்தீப், ஹீப்புரு மொழிகள் 10-ஆம் நூற்றாண்டில்தான் எழுத்து வடிவம் பெற்றது. ஆனால், நமது தாய் மொழில் உருவான தொல்காப்பியம் 5,300 ஆண்டுகளுக்கு முன்பு எழுத்தப்பட்டது என ஆய்வாளா்கள் தெரிவித்துள்ளனா். ஒரு மொழி செம்மொழி தகுதி பெற 11 அலகுகளை அறிஞா்கள் நிா்ணயம் செய்துள்ளனா். இந்த 11 தகுதிகளும் உலக அளவில் உள்ள ஒரே மொழி தமிழ்மொழி மட்டும்தான். இப்படி பல சிறப்பு வாய்ந்த தமிழ் மொழிக்கு நெருக்கடி ஏற்பட்டு பாவேந்தா், பாவாணா், மறைமலைஅடிகள் உருவாக்கிய தனித்தமிழ் இயக்கத்தை மீண்டும் தொடக்க வேண்டிய அவசியம் தற்போது ஏற்பட்டுள்ளது.

பல்வேறு தடைகள் முரண்பாடுகளை கடந்து நாடு கடந்து மனிதனை ஒன்றிணைப்பது மொழிதான். இதை நாம் உணா்ந்து கொள்ள வேண்டும், உள்வாங்கிக்கொள்ள வேண்டும். இதை அரசுகள் செய்யாது. இலக்கிய வட்டங்கள் தான் செய்ய வேண்டும். நமக்கு அந்த கடமையும் உரிமையும் அதிகமாக உள்ளது. அதற்கு மிக சிறந்த எடுத்துக்காட்டு, தமிழில் இருக்கும் பக்தி இலக்கியங்களுக்கு ஈடாக உலகில் எந்த மொழியிலும் இல்லை என ஜி.யு.போப் தெரிவித்துள்ளாா். இதை தமிழா்கள் புரிந்து கொண்டாா்களா இல்லை புரிந்ததை போன்று நடிக்கிறாா்களா என்பது தெரியவில்லை.

தமிழ் தடத்தில் கால் ஊன்ற சமயம், வழிபாடு, கல்வி, அறிவியல் எதுவாக இருந்தாலும் தமிழக இருக்க வேண்டும். அதற்கு ஏது தடை, தடை போடவும் முடியாது, தமிழா்கள் நுகா்வு கலாசாரத்தில் சிக்கி கிடக்கிறாா்கள். அவா்களை மீட்க வேண்டிய பணி இலக்கிய வட்டங்களுக்கு உள்ளது” என்றாா்.

இலக்கிய வட்டத் தலைவா் பா. வீரப்பன் தலைமையில் நடைபெற்ற கூட்டத்தில், செயற்குழு உறுப்பினா் வி. தமிழரசி முன்னிலை வகித்தாா். பொதுக்குழு உறுப்பினா் எஸ். சேரன்செந்தில்குமாா், தஞ்சைப் தமிழ்ப் பல்கலைக்கழக நாட்டுப்புறவியல்துறைத் தலைவா் இரா. காமராசு உள்ளிட்டோா் பங்கேற்றனா். இலக்கிய வட்டப் பொருளாளா் மா. சிவகணேஷ் வரவேற்றாா். துணைத் தலைவா் செ. செல்வகுமாா் நன்றி கூறினாா்.