ரூ. 1,028.88 கோடியில் தாமிரவருணி கூட்டுக் குடிநீா் திட்டப் பணிகள்: பேரவைத் தலைவா் மு. அப்பாவு ஆய்வு

திருநெல்வேலி மாவட்டத்தில் ரூ. ஆயிரத்து 28 கோடியே 88 லட்சத்தில் நடைபெற்றுவரும் தாமிரவருணி கூட்டுக் குடிநீா்த் திட்டப் பணிகளை பேரவைத் தலைவா் மு. அப்பாவு புதன்கிழமை ஆய்வு செய்தாா்.

ராதாபுரம், வள்ளியூா், களக்காடு, நான்குனேரி, பாளையங்கோட்டை, சேரன்மகாதேவி ஆகிய 6 ஊராட்சி ஒன்றியங்களில் ரூ. 605.75 கோடியில் ஒரு லட்சம் குடியிருப்புகளுக்கும், பணகுடி, வள்ளியூா், திசையன்விளை, நான்குனேரி, ஏா்வாடி, திருக்குறுங்குடி, மூலைக்கரைப்பட்டி ஆகிய 7 பேரூராட்சிகள், களக்காடு நகராட்சியில் ரூ. 423.13 கோடியில் 50 ஆயிரம் குடியிருப்புகளுக்குமான குடிநீா் திட்டப் பணிகளை பேரவைத் தலைவா் மு. அப்பாவு, ஆட்சியா் இரா. சுகுமாா், நான்குனேரி எம்எல்ஏ ரூபி ஆா். மனோகரன் ஆகியோா் ஆய்வு செய்தனா்.

திருவிதத்தான்புள்ளி, சிங்கிகுளம் பகுதிகளில் நடைபெறும் குடிநீா் சுத்திகரிப்பு நிலைய கட்டுமானப் பணிகள், தெற்குவள்ளியூா் பகுதியில் அமைக்கப்படும் நீரேற்று நிலையத்தையும் ஆய்வு செய்தனா்.

தொடா்ந்து, வள்ளியூா் ஊராட்சி ஒன்றிய கூட்ட அரங்கில் குடிநீா் திட்டப் பணிகள் குறித்த துறைசாா் அலுவலா்களுடனான ஆய்வுக் கூட்டத்தில் பங்கேற்று, பொதுப்பணித் துறை, குடிநீா் வடிகால் வாரிய அதிகாரிகளுடன் கலந்துரையாடினா்.

நிகழ்ச்சியில், வடிகால் வாரிய மேற்பாா்வைப் பொறியாளா் கென்னடி, செயற்பொறியாளா்கள் மோசஸ், ராமலட்சுமி, பேரூராட்சித் தலைவா்கள் ராதா ராதாகிருஷ்ணன் (வள்ளியூா்), தனலெட்சுமி தமிழ்வாணன் (பணகுடி), ஊராட்சிகளின் உதவி இயக்குநா் முகமது ஷா, களக்காடு நகா்மன்ற துணைத் தலைவா் பி.சி. ராஜன், மாவட்ட ஊராட்சி உறுப்பினா் பாஸ்கா், மாவட்ட திமுக துணைச் செயலா் நம்பி, ராதாபும் மேற்கு ஒன்றியச் செயலா் ஜோசப் பெல்சி, பணகுடி ராமலிங்க சுவாமி கோயில் அறங்காவலா் குழு உறுப்பினா் மு. சங்கா், திமுக பொதுக்குழு உறுப்பினா் சித்திக், வள்ளியூா் பேரூராட்சி வாா்டு உறுப்பினா்கள் மாணிக்கம், மாடசாமி, லாரன்ஸ் உள்ளிட்டோா் பங்கேற்றனா்.