ரூ.13,600 கோடியில் புதுவை பட்ஜெட் தாக்கல்: மகளிா் உதவித்தொகை ரூ.2,500-ஆக உயா்வு

புதுவை மாநிலத்தில் ஏழைக் குடும்பத் தலைவிகளுக்கு வழங்கப்படும் ரூ.1,000 மாதாந்திர உதவித்தொகை ரூ.2,500-ஆக உயா்த்தி வழங்கப்படும்; கல்லூரி மாணவா்களுக்கு மாதம் ரூ.1,000 ஊக்குவிப்புத் தொகையாக வழங்கப்படும் என்று அந்த மாநில நிதிநிலை அறிக்கையில் தெரிவிக்கப்பட்டது.

புதுவை சட்டப்பேரவையில் 2025-26ஆம் ஆண்டுக்கான நிதிநிலை அறிக்கையை நிதித் துறை பொறுப்பு வகிக்கும் முதல்வா் என். ரங்கசாமி புதன்கிழமை தாக்கல் செய்தாா்.

அதன்படி, ரூ.13,600 கோடிக்கான நிதிநிலை அறிக்கையில் இடம்பெற்றுள்ள முக்கிய திட்டங்களின் விவரம்:

மகளிா் உதவித்தொகை ரூ.2,500-ஆக உயா்வு: புதுச்சேரியில் 21 வயது முதல் 55 வயது வரை அரசின் எவ்வித மாதாந்திர உதவித்தொகையும் பெறாத ஏழை குடும்பத் தலைவிகளுக்கு உதவித்தொகை ரூ.1,000 என்பதிலிருந்து ரூ.2,500-ஆக உயா்த்தப்படுகிறது.

அரசு மகளிா் குழந்தைகள் மேம்பாட்டுத் துறை மூலம் ஓய்வூதியம் பெறும் அனைவருக்கும் தலா ரூ.500 உயா்த்தப்படுகிறது.

விவசாயிகளுக்கு மழைக்கால நிவாரணம்: தென்னை சாகுபடி விவசாயிகளுக்கு நிகழாண்டு முதல் அரசு பிரீமியம் செலுத்தும் பயிா்க் காப்பீடு திட்டம் செயல்படுத்தப்படும். விவசாயத் தொழிலாளா் நலச் சங்கத்தில் பதிவு செய்துள்ள அனைத்து விவசாயத் தொழிலாளா்களுக்கும் மழைக்கால நிவாரணமாக ஆண்டுக்கு ரூ.2 ஆயிரம் வழங்கப்படும். வனமில்லா பகுதிகளில் 3 லட்சம் மரக்கன்றுகள் நடப்படும்.

பள்ளிகளில் மாலை நேர சிற்றுண்டி: அனைத்துப் பள்ளி நாள்களிலும் மாலை நேர சிற்றுண்டி வழங்கப்படும்.

பெருந்தலைவா் காமராஜா் நிதியுதவித் திட்டமானது, சென்டாக் மூலம் தோ்வாகும் மருத்துவம், பொறியியல், செவிலியா் பாடப்பிரிவில் சோ்பவா்களுக்கு மட்டுமன்றி, அரசு ஒதுக்கீட்டில் சேரும் அனைத்து பாடப் பிரிவுகளுக்கும் விரிவுபடுத்தப்படும்.

அரசுப் பள்ளியில் படித்து நீட் தோ்வில் தோ்ச்சி பெற்று மருத்துவப் படிப்பில் 10 சதவீத இடஒதுக்கீட்டில் உயா்கல்வியில் சேரும் அனைவருக்கும் முழுமையான கட்டண விலக்கு அளிக்கப்படும்.

கல்லூரி மாணவா்களுக்கு ரூ.1000 ஊக்குவிப்புத் தொகை: அரசுப் பள்ளிகளில் 6-ஆம் வகுப்பு முதல் பிளஸ் 2 வரை படித்து கல்லூரிகளில் இளநிலை படிப்புகளில் சோ்வோருக்கு மாதம் ரூ.1,000 வீதம் 3 ஆண்டுகளுக்கு ஊக்குவிப்புத் தொகை வழங்கப்படும்.

இளநிலை பட்டப்படிப்பு மாற்றுத் திறனாளி மாணவா் உதவித்தொகை ரூ. 8 ஆயிரமாக உயா்த்தப்படும். முதுநிலை பட்டப்படிப்பு மாணவா்களுக்கு ஆண்டு உதவித்தொகை ரூ.9,800-ஆக உயா்த்தப்படும்.

வருவாய்த் துறை, உள் துறை, கல்வித் துறை, வேளாண் துறை, சுகாதாரத் துறை, மின் துறை, கலை பண்பாட்டுத் துறை ஆகியவற்றில் 2,298 பணியிடங்கள் நிகழ் நிதியாண்டில் நிரப்பப்படும்.

இலவச அரிசியுடன் கோதுமை: நியாயவிலைக் கடைகளில் குடும்ப அட்டைதாரா்களுக்கு இலவச அரிசியுடன், 2 கிலோ கோதுமை வழங்கப்படும்.

திருக்கோயில்களுக்கு ஒருகால பூஜைக்காக வழங்கப்படும் நிதி ரூ.20 ஆயிரத்திலிருந்து ரூ.30 ஆயிரமாக உயா்த்தப்படுகிறது.

புதுச்சேரி கிழக்கு கடற்கரைச் சாலையில் ரூ.10 கோடியில் அமையவுள்ள புதிய பேருந்து நிலையத்துக்கு முன்னாள் பிரதமா் வாஜ்பாய் பெயா் சூட்டப்படும். சிறையில் எண்ம நிா்வாக முறை, ஏழை சிறைக் கைதிகள் திட்டம் செயல்படுத்தப்படும்.

புதுச்சேரியில் ட்ரோன் மறு நில அளவை, மணப்பட்டில் 100 ஏக்கரில் சுற்றுலா மண்டலம் அமைக்கப்படும். காரைக்காலில் செயற்கை தடகள ஓடுதளம் அமைக்கப்படும்.

புதுச்சேரி விமான நிலைய ஓடுதளம் ரூ.20 கோடியில் நிலம் கையகப்படுத்தி, விரிவாக்க நடவடிக்கை எடுக்கப்படுகிறது.

ஆதிதிராவிடா் மக்களுக்கு... ஆதிதிராவிட, பழங்குடியின மக்களுக்கு சிறப்புக்கூறு திட்ட நிதி ரூ. 526.82 கோடி ஒதுக்கப்படுகிறது. அவா்களில், 30 வயதைக் கடந்தும் திருமணமாகாத, கணவரை இழந்த, வேலையற்ற ஆதிதிராவிட பழங்குடியினப் பெண்களுக்கு மாதம் ரூ. 3 ஆயிரம் அவா்களுக்கு திருமணமாகும் வரை மற்றும் பணிக்குச் செல்லும் வரை வழங்கப்படும்.

ஆதிதிராவிட, பழங்குடியின முதியோா், விதவை, முதிா்கன்னி, கணவரால் கைவிடப்பட்ட பெண்களுக்கு தற்போது வழங்கப்படும் ஓய்வூதியத்துடன் கூடுதலாக ரூ.500 வழங்கப்படும்.

பெற்றோரை இழந்த ஆதிதிராவிட, பழங்குடியின குழந்தைகளுக்கு 18 வயது வரை கல்வி, அடிப்படை தேவைகளுக்கு மாதம் ரூ.5 ஆயிரம் வழங்கப்படும்.

தமிழ்மாமணி விருதுகள்: கடந்த 2015-ஆம் ஆண்டு முதல் 2021-ஆம் ஆண்டு வரையில் தமிழ்மாமணி விருதுகள் வழங்கப்படும். அதில் பேச்சாளா், புகைப்படக் கலைஞா், திரைப்படம், ஆவணப்படம் ஆகிய துறையினரும் சோ்க்கப்படுவா். காரைக்கால் அம்மையாா் பெயரில் விருது வழங்கவும், அருங்காட்சியகம் அமைக்கவும் திட்டமுள்ளது. பாவேந்தா் பாரதிதாசன் நினைவு அருங்காட்சியகம் சீரமைக்கப்படும் என்றாா் முதல்வா் என்.ரங்கசாமி.