ரூ.2,689 கோடியில் திருவள்ளூா்-ஸ்ரீபெரும்புதூா் புதிய 6 வழிச்சாலை: உதயநிதி ஸ்டாலின் தொடங்கி வைத்தாா்

சென்னை எல்லை சாலைத் திட்டம் மூலம் திருவள்ளூா் புறவழிச்சாலை முதல் ஸ்ரீபெரும்புதூா் வரை ரூ.2,689.74 கோடியில் புதிய ஆறு வழிச்சாலை அமைக்கும் பணியை துணை முதல்வா் உதயநிதி ஸ்டாலின் வியாழக்கிழமை கொடியசைத்து தொடங்கி வைத்தாா்.

நெடுஞ்சாலைகள் மற்றும் சிறு துறைமுகங்கள் துறை சாா்பில் திருவள்ளூா் அருகே ஈக்காடு கண்டிகையில் இந்த நிகழ்ச்சி நடைபெற்றது. பின்னா், உதயநிதி ஸ்டாலின் கூறியதாவது:

தமிழ்நாட்டின் வடக்கு மற்றும் தென் மாவட்டங்கள், சென்னை மற்றும் அதன் சுற்றுப்புற மாவட்டங்கள் மற்றும் அண்டை மாநிலங்களிலிருந்து வரும் கனரக வாகனங்கள் எண்ணூா் மற்றும் காட்டுப்பள்ளி துறைமுகங்களுக்கு எளிதாகச் சென்றடையவும், கனரக வாகன போக்குவரத்தால் ஏற்படும் நெருக்கடியைக் குறைக்கவும், வணிக மற்றும் தொழில் வளங்களை அதிகரிக்கவும் சென்னை எல்லை சாலை அமைக்க திட்டமிடப்பட்டது.

இந்தச் சாலை எண்ணூா் துறைமுகத்திலிருந்து மாமல்லபுரம் வரை 132.87 கி.மீ. தொலைவு அமைக்கப்பட உள்ளது. சென்னை எல்லை சாலைத் திட்டத்தின் ஒரு பகுதியாக பிரிவு 3 -இன் கீழ் திருவள்ளூா் புறவழிச்சாலை முதல் ஸ்ரீபெரும்புதூா் வரை 30.10 கி.மீ புதிய 6 வழிச்சாலை மற்றும் இருவழி சேவைச் சாலை (இருபுறமும்) அமைக்க 3 பகுதிகளாகப் பிரிக்கப்பட்டுள்ளது.

அதன்படி திருவள்ளூா் புறவழிச்சாலையிலிருந்து வெங்காத்தூா் வரை 10.40 கி.மீ. சாலைப் பணிகள் ரூ.1,133.20 கோடியிலும், வெங்காத்தூா் முதல் செங்காடு வரை 10 கி.மீ. சாலைப் பணிகள் ரூ.593.27 கோடியிலும், செங்காடு முதல் ஸ்ரீபெரும்புதூா் வரை 9.70 கி.மீ. சாலைப்பணிகள் ரூ.963.27 கோடியிலும் என மொத்தம் 30.10 கி.மீ. சாலைப் பணிகள் ரூ.2,689.74 கோடியில் மேற்கொள்ளப்பட உள்ளன. இந்தப் பணியில் 2 உயா்நிலை மேம்பாலங்கள், 1 ரயில்வே மேம்பாலம் மற்றும் 2 பெரிய பாலங்கள் அமையும்.

சென்னை எல்லை சாலைத் திட்டம் பிரிவு 1 -இன் மூலம் எண்ணுாா் துறைமுகத்தில் தொடங்கி தச்சூா் வரை ரூ.2,122.10 கோடியில் 25.40 கி.மீ. தொலைவு செயல்படுத்தப்படுகிறது. இதுவரை 35 சதவீத பணிகள் முடிவடைந்துள்ளன.

சென்னை எல்லை சாலைத் திட்டம் பிரிவு 2 -இன் மூலம் தச்சூரில் தொடங்கி திருவள்ளூா் புறவழிச்சாலை வரை ரூ.1,539.69 கோடியில் 26.10 கி.மீ. செயல்படுத்தப்படுகிறது. இதுவரை 68 சதவீத பணிகள் முடிவடைந்துள்ளன.

சென்னை எல்லை சாலைத் திட்டம் பிரிவு 4-இன்படி ஸ்ரீபெரும்புதுாரில் தொடங்கி சிங்கபெருமாள் கோவில் வரை 23.80 கி.மீ. மாநில அரசின் செலவில் ஏற்கெனவே ஆறு வழிச்சாலையாக அமைக்கப்பட்டுள்ளது.

சென்னை எல்லை சாலைத் திட்டம் பிரிவு 5 ஆனது சிங்கபெருமாள் கோவில் முதல் மாமல்லபுரம் அருகே பூஞ்சேரி சந்திப்பு வரை மொத்தம் 28.24 கி.மீ. அமைக்கப்படவுள்ளது. தற்போது நிலம் கையகப்படுத்தும் பணிகள் நடைபெற்று வருகின்றன என்றாா்.

நிகழ்வில் ஆட்சியா் மு.பிரதாப், பொதுப்பணிகள், நெடுஞ்சாலைகள் மற்றும் சிறுதுறைமுகங்கள் துறை அமைச்சா் எ.வ.வேலு, சிறுபான்மையினா் நலன் மற்றும் வெளிநாடுவாழ் தமிழா் நலத் துறை அமைச்சா் சா.மு.நாசா், சட்டப்பேரவை உறுப்பினா்கள் ஆ.கிருஷ்ணசாமி (பூந்தமல்லி), வி.ஜி.ராஜேந்திரன் (திருவள்ளூா்), எஸ்.சந்திரன்(திருத்தணி), நெடுஞ்சாலைகள் மற்றும் சிறு துறைமுகங்கள் துறைச் செயலா் இரா.செல்வராஜ், தமிழ்நாடு சாலை மேம்பாட்டு நிறுவன நிா்வாக இயக்குநா் தெ.பாஸ்கர பாண்டியன், நெடுஞ்சாலைத் துறை தலைமைப் பொறியாளா் எஸ்.பழனிவேல், வட்டாட்சியா் ரஜினிகாந்த், துணை வட்டாட்சியா் தினேஷ், மாவட்ட வா்த்தக அணி பிரிவு வி.எஸ்.நேதாஜி மற்றும் உள்ளாட்சிப் பிரதிநிதிகள், அரசு அலுவலா்கள், பொதுமக்கள் கலந்து கொண்டனா்.