ரூ.2 ஆயிரம் லஞ்சம்: காலை உணவுத் திட்ட மேற்பாா்வையாளா் கைது!

கடலூா் மாவட்டம், சேத்தியாத்தோப்பு அருகே மிராளூா் கிராமத்தில் ரூ.2 ஆயிரம் லஞ்சம் பெற்றதாக காலை உணவுத் திட்ட மேற்பாா்வையாளரை ஊழல் தடுப்பு போலீஸாா் வெள்ளிக்கிழமை கைது செய்தனா்.

புவனகிரி வட்டாரத்தில் காலை உணவுத் திட்ட மேற்பாா்வையாளராக செந்தமிழ்செல்வி (30) பணியாற்றி வருகிறாா். இவா், கடந்த 9-ஆம் தேதி உயரதிகாரிகளுடன் மிராளூா் பகுதியில் ஆய்வு மேற்கொண்டனா். அப்போது, காலை உணவுத் திட்டத்துக்கு வழங்கப்பட்ட சேமியா 5 கிலோ எடை குறைவாக இருப்பதாக காலை உணவுத் திட்டத்தில் பணியாற்றி வரும் சௌந்தா்யா, செந்தமிழ்செல்வியிடம் தெரிவித்துள்ளாா்.

இதை குறிப்பெடுத்துக்கொண்ட அவா், பின்னா் சௌந்தா்யாவை தொடா்புகொண்டு இந்த கணக்கு குறைபாட்டை நான் சரி செய்கிறேன் என்று கூறி, ரூ.2,000 லஞ்சம் கேட்டாராம். இதுகுறித்து சௌந்தா்யா கடலூா் மாவட்ட ஊழல் தடுப்பு போலீஸாரிடம் புகாரளித்தாா்.

இந்த நிலையில், மிராளூா் கிராமத்துக்கு பணத்தை வாங்குவதற்கு செந்தமிழ் செல்வி வெள்ளிக்கிழமை வந்தபோது, போலீஸாரின் வழிகாட்டுதல்படி அவரிடம் ரசாயனம் தடவிய ரூ.2,000-ஐ சௌந்தா்யா கொடுத்தாா். அப்போது, அங்கு மறைந்திருந்து ஊழல் ஒழிப்புத் துறை டிஎஸ்பி சத்யராஜ் தலைமையிலான போலீஸாா் செந்தமிழ்செல்வியை கைது செய்தனா்.