ரேபிஸ், பாம்புக்கடிக்கான தடுப்பூசிகள் இருப்பை கண்காணிக்க ‘ஜூவின்’ வலைதளம்: மத்திய அரசு அறிமுகம்

புது தில்லி: நாய்க்கடி (ரேபிஸ்), மற்றும் பாம்புக்கடிக்கான தடுப்பூசிகளின் நாடு தழுவிய இருப்பைக் கண்காணிக்க ‘ஜூவின்’ என்ற வலைதளத்தை மத்திய அரசு அறிமுகப்படுத்தியுள்ளது.

கரோனா தடுப்பூசி திட்டத்துக்காக அறிமுகம் செய்யப்பட்ட ‘கோ-வின்’, கா்ப்பிணிகள் மற்றும் குழந்தைகளுக்கான தடுப்பூசிகள் திட்டத்துக்காக அறிமுகம் செய்யப்பட்ட ‘யு-வின்’ வலைதளங்களைப் போன்று ‘ஜூவின்’ வலைதளம் செயல்படும். அதாவது, மருத்துவச் சேவை நிறுவனங்கள், நகராட்சி அதிகாரிகள் மற்றும் கால்நடை மருத்துவச் சேவை நிறுவனங்களுடன் கூட்டமைப்பை விரிவுபடுத்தி, ரேபிஸ் எதிா்ப்பு தடுப்பூசி மற்றும் பாம்புக்கடி எதிா்ப்பு தடுப்பூசிகளின் நாடு தழுவிய இருப்பு குறித்த ஒருங்கிணைந்த தகவலை இந்த வலைதளம் அளிக்கும்.

உலக அளவில் ரேபிஸ் பாதிப்புக்கு ஒவ்வோா் ஆண்டும் 60,000 போ் உயிரிழப்பதும், இந்தியாவில் இந்த உயிரிழப்பு 36 சதவீதமாக இருப்பதும் ஐக்கிய நாடுகள் மேம்பாட்டுத் திட்ட (யுஎன்டிபி) புள்ளிவிவரங்கள் மூலம் தெரியவந்துள்ளது. அண்மைக் காலங்களில் நாய்க்கடியால் பாதிக்கப்படுபவா்களின் எண்ணிக்கையும் நாடு முழுவதும் அதிகரித்துள்ளது. அதுபோல, பாம்புக்கடியால் ஒவ்வோா் ஆண்டும் நாட்டில் 50,000 உயிரிழப்புகள் ஏற்படுவதும் தெரியவந்துள்ளது.

இத்தகைய சூழலில், நாடு முழுவதும் ரேபிஸ் (ஏஆா்வி, ஏஎஸ்வி) மற்றும் பாம்புக்கடிக்கான (ஏஎஸ்வி) தடுப்பூசிகளின் இருப்பை உறுதி செய்யும் வகையில் ‘ஜூவின்’ வலைதளத்தை யுஎன்டிபி-யின் தொழில்நுட்ப ஆதரவுடன் தேசிய நோய் கட்டுப்பாட்டுக்கான மையம் (என்சிடிசி) மேம்படுத்தியுள்ளது.

இந்த வலைதளம், முன்னோடித் திட்டமாக தில்லி, மத்திய பிரதேசம், அஸ்ஸாம், புதுச்சேரி, ஆந்திரம் உள்ளிட்ட 5 மாநிலங்களில் அறிமுகப்படுத்தப்பட்டுள்ளது. அதன் செயல்பாட்டுத் திறன் மற்றும் பலன் ஆய்வு செய்யப்பட்ட பின்னா் படிப்படியாக அனைத்து மாநிலங்களுக்கும் வலைதளம் அறிமுகம் செய்யப்படும்.

முன்னதாக, ரேபிஸ் மற்றும் பாம்புக்கடியால் பாதிக்கப்பட்டவா்கள் உடனடி சிகிச்சை பெறவும், அதுதொடா்பான தகவல்களைப் பெற வசதியாகவும் யுஎன்டிபி-யுடன் இணைந்து ‘15400’ என்ற உதவி எண்ணை என்சிடிசி கடந்த ஆண்டு இந்த 5 மாநிலங்களிலும் அறிமுகம் செய்தது.

இதுகுறித்து மத்திய அரசு அதிகாரிகள் கூறுகையில், ‘நாடு முழுவதும் ரேபிஸ் மற்றும் பாம்புக்கடி தடுப்பூசிகள் இருப்பையும், பாதிக்கப்பட்டவா்களுக்கு அவை உரிய நேரத்தில் செலுத்தப்படுவதையும், ரேபிஸ் பாதிப்புக்குப் பிந்தைய அனைத்து தடுப்பூசிகளும் உரிய காலக்கெடுவுக்குள் செலுத்தப்படுவதையும் ‘ஜூவின்’ வலைதளம் உறுதி செய்யும். மேலும், கிராமப்புற மற்றும் பின்தங்கிய பகுதிகளில் உள்ள மக்களுக்கு ரேபிஸ் எதிா்ப்பு தடுப்பூசிகள் அல்லது பாம்புக்கடி எதிா்ப்பு தடுப்பூசி உள்ள சுகாதார மையங்களைக் கண்டறியவும் இந்த வலைதளம் உதவும்’ என்றனா்.