லக்ஷயா வெற்றி; சிந்து தோல்வி

ஜகார்த்தா: இந்தோனேசியா மாஸ்டர்ஸ் பாட்மின்டன் போட்டியில் இந்தியாவின் பிரதான வீராங்கனை பி.வி.சிந்து முதல் சுற்றிலேயே தோற்க, லக்ஷயா சென் 2-ஆவது சுற்றுக்கு முன்னேறினார்.

ஆடவர் ஒற்றையரில், லக்ஷயா சென் 21-9, 21-14 என்ற கேம்களில், ஜப்பானின் டகுமா ஒபயாஷியை 39 நிமிஷங்களில் வென்றார். எனினும், ஆயுஷ் ஷெட்டி, கிரண் ஜார்ஜ், பிரியன்ஷு ரஜாவத் ஆகியோர் முதல் சுற்றிலேயே தோற்றனர்.

மகளிர் ஒற்றையரில், சிந்து 20-22, 12-21 என, வியத்நாமின் தை லி குயெனிடம் தோல்வியைத் தழுவினார். அதேபோல் அனுபமா உபாத்யாய, தன்மய் ஹேம்நாத், ஆகர்ஷி காஷ்யப், ரக்ஷிதா ஸ்ரீ ஆகியோரும் முதல் சுற்றுடனேயே வெளியேறினர்.

கலப்பு இரட்டையரில், துருவ் கபிலா/தனிஷா கிராஸ்டோ இணை 21-18, 21-14 என்ற கேம்களில், இந்தோனேசியாவின் அட்னன் மெளலானா/இண்டா சாயா ஜமில் கூட்டணியை 36 நிமிஷங்களில் வீழ்த்தி, 2-ஆவது சுற்றுக்கு முன்னேறியது. எனினும், ரோஹன் கபூர்/ருத்விகா ஷிவானி ஜோடி தோற்றது.

இந்திய அணி அறிவிப்பு: இதனிடையே, சீனாவில் பிப்ரவரியில் நடைபெறவுள்ள ஆசிய கலப்பு அணிகள் பாட்மின்டன் சாம்பியன்ஷிப்பில் பங்கேற்கவிருக்கும் இந்திய அணி புதன்கிழமை அறிவிக்கப்பட்டது.

ஆடவர் பிரிவில் லக்ஷயா சென், ஹெச்.எஸ். பிரணாய், சாத்விக்சாய்ராஜ் ராங்கிரெட்டி, சிராக் ஷெட்டி, துருவ் கபிலா, எம்.ஆர்.அர்ஜுன், கே.சதீஷ்குமார் ஆகியோர் இடம் பெற்றுள்ளனர். மகளிர் பிரிவில் பி.வி.சிந்து, மாளவிகா பன்சோட், காயத்ரி கோபிசந்த், டிரீசா ஜாலி, அஸ்வினி பொன்னப்பா, தனிஷா கிராஸ்டோ ஆகியோர் இணைந்துள்ளனர்.