வடசென்னையில் கிரிக்கெட் மைதானம் அமைக்கப்படும் என இந்து சமய அறநிலையத் துறை அமைச்சரும், சென்னை பெருநகர வளா்ச்சிக் குழுமத் தலைவருமான பி.கே.சேகா்பாபு தெரிவித்தாா்.
சென்னை அண்ணா நகா், வில்லிவாக்கம் பகுதியிலுள்ள திறந்தவெளி பொதுப் பயன்பாட்டு நிலங்களை (ஒஎஸ்ஆா்), சென்னை பெருநகர வளா்ச்சிக் குழுமம் (சிஎம்டிஏ) சாா்பில் மேம்படுத்துவது குறித்து அமைச்சா் சேகா்பாபு வியாழக்கிழமை நேரில் பாா்வையிட்டு ஆய்வு செய்தாா்.
அப்போது அவா் செய்தியாளா்களிடம் கூறியதாவது:
அண்ணா நகரில் உள்ள வணிக வளாகம் அருகே 4 ஏக்கா் பரப்பளவில் உள்ள ஒஎஸ்ஆா் நிலத்தை மக்கள் பயன்பாட்டுக்கு ஏற்ப மேம்படுத்தப்படவுள்ளது. அதுபோல், ஷெனாய் நகரில் 4 ஏக்கரில் கால்பந்து மற்றும் கூடைப்பந்து மைதானம் அமைக்கப்பட்டு வருகிறது. பயன்பாடில்லாத இடங்களைக் கண்டறிந்து பூங்கா, விளையாட்டுத் திடல்கள் மற்றும் நீச்சல் குளங்கள் போன்ற கட்டமைப்புகள் ஏற்படுத்த திட்டமிடப்பட்டுள்ளது.
வடசென்னை வளா்ச்சித் திட்டத்தில் சிஎம்டிஏ மூலம் ரூ. 2,000 கோடி அளவில் வளா்ச்சி திட்டப் பணிகள் மேற்கொள்ளப்படுகின்றன. இந்நிலையில் வடசென்னையில் கிரிக்கெட் மைதானம் அமைக்கப்படும் என்றாா் அவா்.
ஆய்வின்போது, மேயா் ஆா்.பிரியா, சட்டப் பேரவை உறுப்பினா்கள் வெற்றி அழகன் (வில்லிவாக்கம்), எம்.கே.மோகன் (அண்ணா நகா்), சிஎம்டிஏ உறுப்பினா் செயலா் அன்சுல் மிஸ்ரா உள்ளிட்டோா் உடனிருந்தனா்.
