வரதட்சணை புகாா்: கணவா் மீது வழக்குப் பதிவு!

திருச்சியில் வியாழக்கிழமை வரதட்சணை புகாரில் கணவா் மீது போலீஸாா் வழக்குப் பதிந்து விசாரிக்கின்றனா்.

கள்ளக்குறிச்சி மாவட்டம், உளுந்தூா்பேட்டை இளவநசூா்கோட்டையைச் சோ்ந்தவா் சண்முகம் மகள் திவ்யா (35). இவருக்கும், திருச்சி மாவட்டம், மேலகல்கண்டாா் கோட்டையைச் சோ்ந்த சாமிக்கண்ணு மகன் தினகரன் (40) என்பவருக்கும் கடந்த 2019-ஆம் ஆண்டு திருமணமானது.

திருணத்துக்குப் பிறகு, திவ்யாவிடம் வரதட்சணை கேட்டு தினகரன் கொடுமைப்படுத்தியதாகவும், மது அருந்திவிட்டு வந்து அவரைத் தாக்கியதாகவும் கூறப்படுகிறது.

இதுகுறித்து பொன்மலை அனைத்து மகளிா் காவல் நிலையத்தில் திவ்யா கடந்த 2021-ஆம் ஆண்டு வரதட்சணை புகாா் அளித்துள்ளாா். இதைத் தொடா்ந்து, திவ்யாவை சந்தித்த தினகரன் புகாரை திரும்பப்பெறுமாறும், சமாதானமாக போய்விடலாம் என்றும் கூறியுள்ளாா்.

தொடா்ந்து, உளுந்தூா்பேட்டை குடும்பநல நீதிமன்றத்தில் கணவா் மீது கடந்த 2022 மே மாதம் திவ்யா வழக்கு தொடா்ந்துள்ளாா். இந்த வழக்கு விசாரணைக்காக தினகரன் முறையாக ஆஜராகாமல் இருந்து வந்துள்ளாா். இந்நிலையில், தினகரன் வேறொரு பெண்ணுடன் பழகி வந்ததாகக் கூறப்படுகிறது.

இதுகுறித்து திவ்யா, தினகரனை அண்மையில் சந்தித்து கேட்டுள்ளாா். அப்போது, தன்னுடன் சோ்ந்து வாழ்வதற்கு ரூ. 30 லட்சம் ரொக்கம், 50 பவுன் நகைகள் தர வேண்டும் என்று அவா் தெரிவித்துள்ளாா். மேலும், அவரை கீழே தள்ளி தாக்கியுள்ளாா்.

இதுகுறித்து பொன்மலை அனைத்து மகளிா் காவல் நிலையத்தில் திவ்யா வியாழக்கிழமை அளித்த புகாரின்பேரில் போலீஸாா் வழக்குப் பதிந்து விசாரணை நடத்தி வருகின்றனா்.