விருதுநகர்: வளைவில் கவிழ்ந்து விபத்துக்குள்ளான அரசு பேருந்து; 19 பயணிகள் படுகாயம்!

விருதுநகரில் இருந்து கிளம்பிய டவுன் பஸ் ஒன்று, கட்டுப்பாட்டை இழந்து பள்ளத்தில் கவிந்ததில் 19 பயணிகள் காயமடைந்தனர். இந்தச் சம்பவம் குறித்து போலீஸிடம் விசாரித்தோம். அப்போது பேசியவர்கள், "விருதுநகர் பழைய பேருந்து நிலையத்திலிருந்து கவுண்டம்பட்டிக்கு (நேற்று) டவுன் பஸ் ஒன்று புறப்பட்டது. பேருந்தை கே.உசிலம்பட்டியைச் சேர்ந்த ஸ்ரீதரன் (வயது 30) ஓட்டினார். மதுரை மாவட்டம், எம்.புளியங்குளத்தைச் சேர்ந்த சௌந்தரபாண்டியன் (35) என்பவர் நடத்துனராக இருந்தார். பஸ்ஸில் 80-க்கும் மேற்பட்ட பயணிகள் இருந்தனர். முக்கிய கிராமங்கள் வழியே செல்லும் பஸ் என்பதால், பஸ்ஸில் கல்லூரி மாணவ-மாணவிகள், பள்ளி மாணவர்கள் கூட்டம் அதிகமாக இருந்தது. இந்த நிலையில், பஸ் விருதுநகரை அடுத்த பாவாலி கிராமத்தை கடந்து சந்திரகிரிபுரம் ஊருக்கு வந்து கொண்டிருந்தது.

அப்போது கண்மாயை ஒட்டி வளைவு ஒன்றில் திரும்ப முற்பட்டபோது அதிக பாரம் காரணமாக கட்டுப்பாட்டை இழந்த பஸ், கண்மாய் ஓடை பள்ளத்தில் கவிழ்ந்து விபத்துக்குள்ளானது. இந்த விபத்தில் பாண்டிச் செல்வி(35), கிருஷ்ணவேணி (16), ரஞ்சித்(16), முத்தரசி(14), மீனாட்சி (49), ராம்தர்ஷன்(14), மாதவன் (13), தீபக்குமார்(16), ஹரி பாலாஜி(12), சத்யா(24), மீனா(39) லோகேஷ், பத்மஸ்ரீ(13) ஆகியோர் உள்பட 19 பயணிகள் படுகாயம் அடைந்தனர். மேலும் சிலருக்கு சிறு, சிறு காயங்கள் ஏற்பட்டது. விபத்தை பார்த்த அக்கம் பக்கத்தினர் ஓடிவந்து பஸ்ஸுக்குள் சிக்கியிருந்த பயணிகளை மீட்டு ஆம்புலன்ஸ் மூலமாக விருதுநகர் அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்தனர். இந்த விபத்து குறித்து ஆமத்தூர் போலீஸார் வழக்குப்பதிவு செய்து விசாரணை நடத்தி வருகின்றனர்" என்றனர்.