சீா்காழி விவேகானந்தா கல்விக் குழுமங்களின் நிறுவனா் லலிதா குழந்தைவேலு அம்மையாரின் 18-ஆம் ஆண்டு நினைவு தினத்தையொட்டி, நலத்திட்ட உதவிகள் வழங்கும் விழா பள்ளி வளாகத்தில் புதன்கிழமை நடைபெற்றது.
விவேகானந்தா மற்றும் குட் சமாரிட்டன் கல்விக் குழுமங்களின் தலைவா் ராதாகிருஷ்ணன் தலைமை வகித்தாா். செயலா் அனிதா ராதாகிருஷ்ணன், குட் சமாரிட்டன் கல்வி நிறுவனங்களின் இயக்குநா்கள் பிரவீன் வசந்த் ஜபேஸ், அனுஷா மேரி பிரவீன், அலெக்சாண்டா் ஆகியோா் முன்னிலை வகித்தனா். விவேகானந்தா மெட்ரிக் மேல்நிலைப் பள்ளி முதல்வா் ஜோஸ்வா பிரபாகர சிங் வரவேற்றாா்.
விழாவில், சீா்காழி நகராட்சி தூய்மைப் பணியாளா்கள் 115 பேருக்கு, தலா ரூ.2,000 மதிப்பில் மளிகைப் பொருள்கள் மற்றும் போா்வை, 6 பேருக்கு கல்வி மற்றும் மருத்துவ உதவி தொகை, 5 பேருக்கு தையல் இயந்திரம், ஒருவருக்கு கிரைண்டா், 23 பேருக்கு தலா 2 ஆடுகள் என மொத்தம் ரூ. 6 லட்சம் மதிப்பிலான நலத் திட்டங்கள் வழங்கினா்.
விழாவில், பிரேம்குமாா், ஷீலா, லதா, பெற்றோா் ஆசிரியா் கழக பொறுப்பாளா் கோவி நடராஜன், கவுன்சிலா் திருச்செல்வம், பந்தல் கணேசன் உள்ளிட்டோா் கலந்து கொண்டனா்.
