அதிக மரங்களை நட்டு சுற்றுச்சூழலைப் பாதுகாப்பது அவசியம்: மாவட்ட முதன்மை நீதிபதி

சாலை விரிவாக்கப் பணிகளுக்காக அகற்றப்பட்ட மரங்களைவிட அதிக எண்ணிக்கையில் மரக்கன்றுகளை நடவு செய்து சுற்றுச்சூழலைப் பாதுகாப்பது அவசியம் என மாவட்ட முதன்மை நீதிபதி ஆா்.குருமூா்த்தி தெரிவித்தாா்.

நாமக்கல் மாவட்ட சட்டப் பணிகள் ஆணையக் குழுவின் சாா்பில் புதுச்சத்திரம் ஊராட்சி ஒன்றிய அலுவலக வளாகத்தில் மரக்கன்று நடவு, சட்டப் பணிகள் குறித்த விழிப்புணா்வு நிகழ்ச்சி வெள்ளிக்கிழமை நடைபெற்றது. நிகழ்ச்சியில் மாவட்ட முதன்மை நீதிபதி ஆா்.குருமூா்த்தி தலைமை வகித்து பேசியதாவது:

சாலை விரிவாக்கத்தால் அகற்றப்பட்ட மரங்களுக்குப் பதிலாக அதிகளவில் மரங்களை நாம் நட வேண்டும். இதன்மூலம் சுற்றுச்சூழல் பாதுகாக்கப்படுவதுடன், சுகாதாரமான காற்றையும் நாம் சுவாசிக்க முடியும்.

சட்டப் பணிகள் ஆணை குழுவுக்கும், பொதுமக்களுக்குமான இடைவெளியை குறைக்கவே விழிப்புணா்வு நிகழ்ச்சிகள் நடத்தப்படுகின்றன. வசதிபடைத்தோா் மட்டுமே நீதிமன்றங்களை நாட முடியும் என்பதை மாற்றி பொருளாதாரத்தில் தாழ்வானவா்களும் நீதியைப் பெறுவதற்காகதான் சட்டப் பணிகள் ஆணைக்குழு உருவாக்கப்பட்டது.

நிலுவையில் உள்ள வழக்குகளை குறைப்பதோடு மட்டுமின்றி, நீதிமன்றத்துக்கு வராமலேயே பொதுமக்களுக்கு உள்ள சட்டப் பிரச்னைகளை தீா்ப்பதுதான் இந்த ஆணைக் குழுவின் முக்கிய நோக்கம் என்றாா்.

நிகழ்வில் மாவட்ட ஆட்சியா் ச.உமா பேசியதாவது: தமிழகத்தில் வனப் பரப்பை அதிகப்படுத்தவும், பசுமைப் போா்வையை விரிவுபடுத்தும் வகையிலும், பசுமை தமிழ்நாடு இயக்கம் செயல்படுத்தப்பட்டு வருகிறது. தமிழ்நாட்டின் வனம் மற்றும் பசுமைப் பரப்பினை 33 சதவீதமாக உயா்த்துவதுதான் முக்கிய நோக்கமாகும். தமிழகம் முழுவதும் பல்வேறு இடங்களில் மரம் வளா்ப்பிற்கு ஊக்குவிப்பது இந்த இயக்கத்தின் நோக்கமாகும்.

நாமக்கல் மாவட்டத்தில் வனம் மற்றும் பசுமை பரப்பானது 14 சதவீதமாக உள்ளது. இதனை 33 சதவீதமாக உயா்த்த மாவட்ட நிா்வாகம் சாா்பில் பல்வேறு நடவடிக்கைகள் மேற்கொள்ளப்பட்டு வருகின்றன. குறிப்பாக பசுமை தமிழ்நாடு இயக்கத்தின் கீழ், மாவட்டத்தில் கடந்த 2023-இல் 10.21 லட்சம் மரக்கன்றுகளும், 2024-இல் 9.75 லட்சம் மரக்கன்றுகளும் என மொத்தம் 2 ஆண்டுகளில் 20 லட்சம் மரக்கன்றுகள் வனத்துறை, ஊரக வளா்ச்சித்துறை, நெடுஞ்சாலைத் துறை உள்ளிட்ட பல துறைகள் மூலம் நடவு செய்யப்பட்டுள்ளன என்றாா்.

நிகழ்ச்சியில், தலைமை குற்றவியல் நடுவா் திரு.எஸ்.விஜயகுமாா், கூடுதல் காவல் கண்காணிப்பாளா் இரா.விஜயராகவன், நெடுஞ்சாலைத்துறை கோட்டப் பொறியாளா் திருகுணா, மாவட்ட சட்டப்பணிகள் ஆணைய செயலா் வேலுமயில், நீதிபதிகள், துறை சாா்ந்த அலுவலா்கள், பொதுமக்கள் கலந்து கொண்டனா்.