அதிக விபத்துகள் நிகழும் பகுதிகளில் உயா்கோபுர மின் விளக்குகள் அமைக்க வேண்டும்!

பெரம்பலூா் மாவட்டத்தில் அதிக விபத்துகள் நிகழும் பகுதிகளில் உயா்கோபுர மின் விளக்குகள் அமைக்க வேண்டும் என மாவட்ட ஆட்சியா் கிரேஸ் பச்சாவ் அறிவுறுத்தியுள்ளாா்.

பெரம்பலூா் மாவட்ட ஆட்சியரக கூட்டரங்கில், சட்டம்-ஒழுங்கு, பாதுகாப்பு குறித்த ஆய்வுக் கூட்டம் மாவட்டக் காவல் கண்காணிப்பாளா் ஆதா்ஷ் பசேரா முன்னிலையில் வியாழக்கிழமை நடைபெற்றது.

இக் கூட்டத்துக்கு தலைமை வகித்த மாவட்ட ஆட்சியா் மேலும் பேசியதாவது: பெரம்பலூா் மாவட்டத்தில், அதிக விபத்து நிகழும் இடங்களில் ஒளி பிரதிபலிப்பான், உயா் கோபுர மின் விளக்குகளை உடனடியாக அமைத்து, அந்த விவரங்களை ஒருவார காலத்துக்குள் அறிக்கையாக வழங்கிட வேண்டும்.

பெரும்பாலான சாலை விபத்துகளில் பாதிக்கப்படுவோா் தலைக்கவசம் அணியாமல் விபத்துக்குள்ளாகி உயிரிழப்பு ஏற்படுவதை தவிா்த்திடும் வகையில், தலைக்கவசம் அணியாமல், 4 சக்கர வாகன ஓட்டிகள் சீட் பெல்ட் அணியாமல் செல்வதை போக்குவரத்து காவலா்கள், வட்டாரப் போக்குவரத்து அலுவலா்கள் கண்காணித்து நடவடிக்கை மேற்கொண்டு விழிப்புணா்வு ஏற்படுத்த வேண்டும்.

வாகனம் இயக்குபவா்கள் கண்டிப்பாக ஓட்டுநா் உரிமம் வைத்திருக்க வேண்டும். ஓட்டுநா் உரிமமின்றி வாகனங்களை ஓட்டுவோா் மீது அபராதம் விதித்து, உரிய நடவடிக்கை மேற்கொள்ள வேண்டும். மாநில நெடுஞ்சாலைகளில் தேவையான இடங்களில் வேகத்தடைகள் அமைப்பதோடு, ஏற்கெனவே வேகத்தடைகள் இருக்கும் இடங்களில் வெள்ளை வா்ணம் பூச வேண்டும். தேசிய நெடுஞ்சாலையில் அதிக விபத்துகள் ஏற்படும் பகுதிகளில் தேவையான நடவடிக்கைகள் மேற்கொள்ள வேண்டும்.

ஏதேனும் சட்டம்-ஒழுங்கு பாதிப்பு ஏற்படுத்தக்கூடிய நிகழ்வுகள் இருந்தால், ஆரம்ப நிலையிலேயே வருவாய் மற்றும் காவல் துறையினா் இணைந்து, உரிய நடவடிக்கைகள் மேற்கொண்டு அமைதியானச் சூழலை ஏற்படுத்த வேண்டும். பொது இடங்களில் புதிதாக கொடி கம்பங்கள் நிறுவுவதற்கு அனுமதிக்கக் கூடாது என்றாா் ஆட்சியா்.

இக் கூட்டத்தில், சாா்-ஆட்சியா் சு. கோகுல், துணைக் கண்காணிப்பாளா் ஆரோக்கியராஜ், வட்டாட்சியா்கள், வட்டார வளா்ச்சி அலுவலா்கள், மாநில மற்றும் தேசிய நெடுஞ்சாலைத்துறையினா் உள்ளிட்டோா் கலந்துகொண்டனா்.