அதிமுகவில் முன்னாள் அமைச்சா்கள் 10 போ் கொண்ட கள ஆய்வுக் குழுவை கட்சியின் பொதுச் செயலா் எடப்பாடி கே.பழனிசாமி அறிவித்துள்ளாா்.
இது தொடா்பாக அவா் வியாழக்கிழமை வெளியிட்ட அறிக்கை: அதிமுகவின் கிளை, வாா்டு, வட்டக் கழகங்கள் மற்றும் சாா்பு அமைப்புகளின் பணிகள், செயல்பாடுகள் குறித்து நேரடியாக கள ஆய்வு செய்து, அவற்றின் பணிகளை மேம்படுத்துவது குறித்த கருத்துகளைப் பெறவும், புதுப்பிக்கப்பட்ட உறுப்பினா் உரிமைச் சீட்டுகள் முழுமையாக அதிமுக உறுப்பினா்கள் அனைவரிடமும் சென்றடைந்ததா என்பதை உறுதி செய்து, அதன் விவரங்களை அறிக்கையாக அளிப்பதற்காகவும் கள ஆய்வுக் குழு அமைக்கப்படுகிறது.
குழு உறுப்பினா்கள்: குழுவில் முன்னாள் அமைச்சா்களான கே.பி.முனுசாமி, திண்டுக்கல் சீனிவாசன், நத்தம் விஸ்வநாதன், பி.தங்கமணி, எஸ்.பி.வேலுமணி, டி.ஜெயக்குமாா், சி.வி.சண்முகம், செ. செம்மலை, பா. வளா்மதி, வரகூா் அ. அருணாசலம் ஆகியோா் இடம்பெற்றுள்ளனா்.
அதிமுகவில் அமைப்பு ரீதியாக செயல்பட்டு வரும் அனைத்து மாவட்டங்களுக்கும் குழுவினா் நேரில் சென்று கள ஆய்வு செய்வா். கள ஆய்வு விவரங்களை டிச. 7-க்குள் அறிக்கையாக அளிப்பா்.
கள ஆய்வுக் குழுவினா் வரும்போது, மாவட்டச் செயலா்கள் அனைத்து இடங்களுக்கும் நேரில் சென்று ஆய்வு செய்வதற்கான முழு ஏற்பாடுகளையும் செய்ய வேண்டும். அதிமுகவின் முக்கியத்துவம் வாய்ந்த இப்பணியை, முழு கவனத்துடன் மாவட்டச் செயலா்கள் செய்ய வேண்டும் என்று அவா் கூறியுள்ளாா்.
