அனுமதியின்றி கம்பம் நட்டு கொடியேற்ற முயன்ற நாம் தமிழா் கட்சியினா் 8 போ் கைது

பெரம்பலூா் புறநகா் பகுதியில் அனுமதியின்றி பொது இடத்தில் கொடிக் கம்பம் நட்டு, கொடியேற்ற முயன்ற நாம் தமிழா் கட்சியைச் சோ்ந்த 8 பேரை போலீஸாா் ஞாயிற்றுக்கிழமை கைது செய்தனா்.

பெரம்பலூா் துறைமங்கலம் 3 சாலை சந்திப்புப் பகுதியில், புதிதாக கொடிக் கம்பம் நட்டு கொடியேற்ற நாம் தமிழா் கட்சியினா் பெரம்பலூா் காவல் நிலையத்தில் அனுமதி கேட்டிருந்தனா். இதற்கு, போலீஸாா் அனுமதி மறுத்தனா்.

இந்நிலையில், அக் கட்சியின் பெரம்பலூா் (மே) மாவட்டச் செயலா் பாலகுரு தலைமையில், அக் கட்சியினா் ஞாயிற்றுக்கிழமை காலை கொடிக்கம்பம் நட்டு கொடியேற்ற முயன்றனா். இதையடுத்து, அனுமதியின்றி கொடிக் கம்பம் நட்டு கொடியேற்ற முயன்ற 1 பெண் உள்பட 8 பேரை பெரம்பலூா் போலீஸாா் கைது செய்து, கொடிக் கம்பத்தையும் பறிமுதல் செய்தனா். கைது செய்யப்பட்டோா் மாலையில் விடுவிக்கப்பட்டனா். பறிமுதல் செய்யப்பட்ட கொடிக்கம்பம் வட்டாட்சியரகத்தில் ஒப்படைக்கப்பட்டது.