"அமெரிக்காவுடன் இணைந்து எஃப்-414 ஜெட் என்ஜின் தயாரிப்பு: அடுத்தாண்டு மார்ச் மாதம் ஒப்பந்தம் இறுதியாக வாய்ப்பு'

"எஃப்-414 ஜெட் என்ஜின்களை அமெரிக்காவின் ஜிஇ ஏரோஸ்பேஸ் நிறுவனத்துடன் இணைந்து தயாரிப்பது தொடர்பான ஒப்பந்தம் அடுத்தாண்டு மார்ச் மாதத்தில் இறுதிசெய்யப்படும்' என ஹிந்துஸ்தான் ஏரோநாட்டிகல் நிறுவனத்தின் (எச்ஏஎல்) தலைவரும் நிர்வாக இயக்குநருமான டி.கே.சுனில் தெரிவித்தார்.

கடந்த 2023-ஆம் ஆண்டு அமெரிக்காவுக்கு பிரதமர் நரேந்திர மோடி சுற்றுப்பயணம் மேற்கொண்டார். அப்போது எஃப்-414 ஜெட் என்ஜின்களை அமெரிக்காவுடன் இணைந்து இந்தியாவில் தயாரிக்கும் திட்டம் அறிவிக்கப்பட்டது. இருப்பினும், நவீன தொழில்நுட்பங்களை பகிர்ந்துகொள்வதில் இழுபறி நீடித்து வருவதால் இந்த திட்டம் தற்போது வரை செயல்பாட்டுக்கு வரவில்லை.

இதுதொடர்பாக பிடிஐ செய்தி நிறுவனத்துக்கு டி.கே.சுனில் கூறியதாவது: தொழில்நுட்ப பரிமாற்றம் (டிஓடி) நடைமுறைகள் குறித்து அமெரிக்காவைச் சேர்ந்த ஜிஇ ஏரோஸ்பேஸ் நிறுவனத்துடன் ஆலோசித்து வருகிறோம். இதுதொடர்பாக 80 சதவீத பேச்சுவார்த்தை நிறைவடைந்துவிட்டன. அடுத்து வர்த்தகரீதியாக இதை பயன்பாட்டுக்கு கொண்டு வருவது குறித்து ஆலோசிக்கவுள்ளோம்.

அடுத்த மார்ச் மாதம் ஜிஇ ஏரோஸ்பேஸ் நிறுவனத்துடன் இணைந்து எஃப்-414 ஜெட் என்ஜின்களை தயாரிப்பது தொடர்பான ஒப்பந்தம் இறுதிசெய்யப்படும் என நம்புகிறேன்.

ஏனெனில், எஃப்-414 ஜெட் என்ஜின்கள் தயாரிப்பு திட்டத்தின்கீழ் தொழில்நுட்ப பரிமாற்றம் மேற்கொள்வது தேஜஸ் இலகு ரக போர் விமானம் மார்க் 2 வகை மற்றும் 5-ஆம் தலைமுறை நவீன நடுத்தர போர் விமானம் (ஏஎம்சிஏ) ஆகிய திட்டங்களுக்கு மிகவும் முக்கியமானதாகும்.

அதேபோல் இந்திய ராணுவத்துக்கு இலகுரக போர் ஹெலிகாப்டரான "பிரசண்ட்' ஹெலிகாப்டரை விநியோகிக்கும் ஒப்பந்தத்தை எச்ஏஎல் வெற்றிகரமாக கைப்பற்றியது. அதன்படி 2028 முதல் பிரசண்ட் ஹெலிகாப்டர்களை ராணுவத்துக்கு விநியோகிக்கும் பணிகள் தொடங்கப்படவுள்ளன.

இந்திய ராணுவ வரலாற்றில் மிகப்பெரும் ஒப்பந்தமாகும்' என்றார்.

180 தேஜஸ் மார்க் 1ஏ வகை போர் விமானங்கள் ரூ.1.15 லட்சம் கோடியில் எச்ஏஎல்-இடமிருந்து இந்திய விமானப் படை கொள்முதல் செய்யவுள்ளது. தேஜஸ் மார்க் 1ஏ இலகு ரக போர் விமானம் மற்றும் ஏஎம்சிஏ திட்டம் ஆகிய இரண்டும் இந்திய விமானப்படையில் மிகவும் முக்கியத்துவம் வாய்ந்தவையாக கருதப்படுகின்றன.

இத்துடன் 156 பிரசண்ட் ஹெலிகாப்டர்களை ரூ.62,700 கோடியில் எச்ஏஎல்-இடமிருந்து கொள்முதல் செய்யும் பணிகளை கடந்த மார்ச் பாதுகாப்பு அமைச்சகம் விரைவுப்படுத்தியது.

பிரசண்ட் ஹெலிகாப்டர் உள்நாட்டிலேயே முதல்முதலாக தயாரிக்கப்பட்டு 4,500 மீட்டர் உயரத்தில் சிறப்பாக செயல்படக்கூடிய திறனுடைய ஹெலிகாப்டராகும் என்பது குறிப்பிடத்தக்கது.