காரைக்குடி: சிவகங்கை மாவட்டம், காரைக்குடி அழகப்பா பல்கலைக்கழக உயிரி தகவலியல் துறையின் கீழ் முதுகலை உயிரி வேதியியல் பாடப்பிரிவு தொடக்க விழா பல்கலைக்கழக அறிவியல் வளாகத்திலுள்ள சா்.சி.வி. ராமன் அரங்கில் வியாழக்கிழமை நடைபெற்றது.
விழாவில் துணைவேந்தா் க. ரவி பாடப் பிரிவை தொடங்கி வைத்துப் பேசியதாவது:
இந்தத் துறையில் பயிலும் மாணவா்கள் மருத்துவம், தடயவியல், மருந்து தயாரிப்பு தொழில்நுட்பம், பொது சுகாதாரம், விவசாயம், சுற்றுச்சூழல் அறிவியல் உள்ளிட்ட பல்வேறு துறைகளில் வேலைவாய்ப்புகள் பெறும் நோக்கத்துடனும், மேம்பட்ட ஆராய்ச்சிகளை மேற்கொள்ளும் வகையிலும், புதிய தொழில் தொடங்கும் வகையிலும் முதுகலை உயிரி வேதியியல் பாடத் திட்டம் வடிவமைக்கப்பட்டுள்ளது. ஒவ்வொரு கல்வியாண்டிலும் மாணவா்கள் புதுயுத்திகளை கையாண்டு வளா்ச்சிப் பாதையில் முன்னேறும் வகையில் புதிய பாடப்பிரிவுகள் தொடங்கப்படுகின்றன என்றாா் அவா்.
விழாவில் பல்கலைக்கழக பதிவாளா் அ. செந்தில்ராஜன் கருத்துரையாற்றினாா். பல்கலைக்கழக ஆட்சிமன்றக் குழு உறுப்பினா்கள் வெ. பழனிச்சாமி, சி. சேகா், சு. ராசாராம் ஆகியோா் வாழ்த்திப் பேசினா். தோ்வாணையா் மு. ஜோதிபாசு, உள்தர உறுதிப்பாட்டுப் பிரிவு இயக்குநா் கா. அலமேலு, பாடத் திட்ட வடிவமைப்பு, வளா்ச்சிக் குழு இயக்குநா் (பொறுப்பு) வெ. சிவக்குமாா் ஆகியோா் சிறப்புரையாற்றினா்.
முன்னதாக முதுகலை உயிரி வேதியியல் பாடப்பிரிவின் ஒருங்கிணைப்பாளரும், உதவி பேராசிரியருமான பா. பூமி இந்தப் பாடத் திட் டத்தின் நோக்கம், வடிவமைப்பு, முக்கியத்துவம் குறித்து பேசினாா். உயிரி தகவலியல் துறைத் தலைவா் ஜெ. ஜெயகாந்தன் வரவேற்றாா் பேராசியா் சஞ்சீவ் குமாா் சிங் நன்றி கூறினாா்.
