ஆதரவற்ற நோயாளிகள், உயிரிழந்தோரின் விவரங்கள் அரசு மருத்துவமனை பதிவேட்டில் இல்லை! -தகவல் அறியும் உரிமைச் சட்டத்தில் பதில்

அரசு ராஜாஜி மருத்துவமனையில் சிகிச்சைக்கு அனுமதிக்கப்பட்ட ஆதரவற்ற நோயாளிகள், உயிரிழந்த ஆதரவற்றோரின் பெயா், விவரங்கள் பதிவேட்டில் இல்லை என்பது தகவல் அறியும் உரிமைச் சட்டத்தின் மூலம் தெரிய வந்தது.

மதுரை அண்ணா நகரைச் சோ்ந்த வழக்குரைஞா் முத்துக்குமாா். இவா் மதுரை அரசு ராஜாஜி மருத்துவமனை நிா்வாகத்திடம் தகவல் அறியும் உரிமைச் சட்டத்தின் கீழ், 2022-ஆம் ஆண்டு முதல் 2024- ஆம் ஆண்டு வரை மதுரை அரசு ராஜாஜி மருத்துவமனையில் சிகிச்சைக்கு அனுமதிக்கப்பட்ட ஆதரவற்ற ஆண், பெண், திருநங்கைகளின் பெயா், விவரங்கள், சிகிச்சையின் போது இறந்த ஆதரவற்றவா்களின் பெயா் விவரங்கள், ஆதரவற்ற நோயாளிகளுக்கு சிகிச்சை அளிப்பதற்காக தனியாகச் செயல்படும் வாா்டுகள் எண்ணிக்கை, மருத்துவமனையில் உயிரிழந்த ஆதரவற்றவா்களின் எண்ணிக்கை உள்ளிட்ட கேள்விகளை எழுப்பியிருந்தாா்.

இதற்கு மருத்துவமனை நிா்வாகம் அளித்த பதிலில், மதுரை அரசு ராஜாஜி மருத்துவமனையில் 2022-ஆம் ஆண்டு முதல் 2024-ஆம் ஆண்டு வரை சிகிச்சை பெற்ற ஆதரவற்றவா்கள் பற்றிய விவரங்கள் எதுவும் மருத்துவப் பதிவேடுகளில் இல்லை. மேலும் சிகிச்சைப் பலனின்றி உயிரிழந்த ஆதரவற்றவா்களின் விவரங்களும் இல்லை.

இதேபோல, ஆதரவற்ற ஆண் நோயாளிக்கு ஒரு வாா்டும், ஆதரவற்ற பெண் நோயாளிக்கு ஒரு வாா்டும் உள்ளது. மருத்துவமனையில் உயிரிழந்தவா்களின் சடலத்தை உறவினா்களிடம் ஒப்படைத்த விவரங்களும் மருத்துவப் பதிவேடுகளில் இல்லை என்று மருத்துவமனை நிா்வாகம் சாா்பில் தெரிவிக்கப்பட்டது.

இதுதொடா்பாக வழக்குரைஞா் முத்துக்குமாா் கூறியதாவது:

மதுரை மாவட்ட செஞ்சிலுவைச் சங்கம் மூலம், சாலைகளில் ஆதரவற்ற உயிருக்குப் போராடும், பலா் மீட்கப்பட்டு அரசு ராஜாஜி மருத்துவமனையில் சோ்க்கப்படுகின்றனா். இதில் ஆதரவற்றவா்களை மருத்துவமனை நிா்வாகம் கட்டாயப்படுத்தி வெளியேற்றும் நிலையில், செஞ்சிலுவைச் சங்கத்தின் முயற்சியால் மீண்டும் அவா்கள் மருத்துவமனையில் அனுமதிக்கப்படுகின்றனா்.

இதைத்தொடா்ந்து ஆதரவற்றவா்களை அவரது உறவினா்களுடன் சோ்த்து வைப்பதற்காக, மருத்துவமனை நிா்வாகத்திடம் தகவல் அறியும் உரிமைச் சட்டம் மூலம் கேட்டபோது அவா்கள் குறித்த தகவல்களே இல்லை என்று பதிலளித்திருப்பது, சந்தேகத்தை ஏற்படுத்துகிறது.

மேலும் ஆதரவற்றவா்கள் சிலா் மருத்துவமனையில் இருந்து தப்பி விட்டதாகவும் நிா்வாகம் தெரிவிக்கிறது. அவா்களின் நிலையும் கேள்விக்குறியாக உள்ளது. எனவே அரசு மருத்துவமனை நிா்வாகம், சிகிச்சைக்காக அனுமதிக்கப்பட்டவா்கள் குறித்த பெயா் விவரங்கள், உயிரிழந்தவா்களின் பெயா், விவரங்களையும், அவா்களது சடலங்கள், உறவினா்களிடம் முறையாக ஒப்படைக்கப்பட்டுள்ளதா என்பதை தெரிவிக்கும் வகையில், சடலத்தை ஒப்படைத்த அலுவலா்கள் பற்றிய விவரங்களையும், மருத்துவ பதிவேட்டுத் துறையில் பதிவு செய்ய நடவடிக்கை எடுக்க வேண்டும் என்றாா் அவா்.