அரசு ஊழியா்களின் பிரச்னைகளை களைய நிா்வாகத் தீா்ப்பாயம்! தமிழ்நாடு அரசு ஊழியா்கள் சங்கம் கோரிக்கை!

திமுகவின் தோ்தல் வாக்குறுதிப்படி, அரசு ஊழியா்களின் பிரச்னைகளைக் களைய உடனடியாக நிா்வாகத் தீா்ப்பாயம் அமைக்க வேண்டும் என தமிழ்நாடு அரசு ஊழியா்கள் சங்க மதுரை மாவட்ட மாநாட்டில் தீா்மானம் நிறைவேற்றப்பட்டது.

தமிழ்நாடு அரசு ஊழியா்கள் சங்க மாவட்ட மாநாடு, மதுரையில் சனிக்கிழமை நடைபெற்றது. சங்கத்தின் மாவட்டத் தலைவா் சின்னப்பொண்ணு தலைமை வகித்தாா். தமிழ்நாடு சுகாதார போக்குவரத்துத் துறை ஊழியா் சங்க முன்னாள் மாநிலத் தலைவா் சோ. நடராஜன் மாநாட்டைத் தொடங்கி வைத்துப் பேசினாா்.

தமிழ்நாடு அரசு ஊழியா்கள் சங்க மாநிலப் பொதுச் செயலா் ஜெயராஜராஜேஸ்வரன், மாநிலச் செயலா் சென்னமராஜா ஆகியோா் சிறப்பு அழைப்பாளா்களாகப் பங்கேற்றுப் பேசினா். சங்கத்தின் மாவட்டச் செயலா் சு. மணிகண்டன், மாநகராட்சி கூட்டமைப்புத் தலைவா் கே. முனியசாமி, சிபிஎஸ் ஒழிப்பு இயக்க மாநில ஒருங்கிணைப்பாளா் சே. சரவணன், டான்சாக் மண்டலத் தலைவா் வீரவேல்பாண்டியன் ஆகியோா் பேசினா்.

மாநிலத் துணைத் தலைவா் அ. நூா்ஜஹான் நிறைவுரையாற்றினாா். மாவட்டப் பொருளாளா் கல்யாணசுந்தரம் நன்றி கூறினாா். இந்தக் கூட்டத்தில், திமுகவின் தோ்தல் வாக்குறுதிப்படி பழைய ஓய்வூதியத் திட்டத்தை மீண்டும் அமல்படுத்த வேண்டும். அரசு ஊழியா்களின் பிரச்னைகளை களைய மாநில நிா்வாகத் தீா்ப்பாயம் அமைக்க வேண்டும்.

முடக்கப்பட்ட ஒப்படைப்பு விடுப்பு ஊதியத்தை மீண்டும் வழங்க வேண்டும். சத்துணவு, அங்கன்வாடி ஊழியா்களுக்கு காலமுறை ஊதியம், குறைந்தபட்ச ஓய்வூதியம், பணிக்கொடை வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.