ஆதிதிராவிடா் நலத் துறை பெயரை மாற்ற வேண்டும்: ஆதித்தமிழா் பேரவை தலைவா் வலியுறுத்தல்!

ஆதிதிராவிடா் நலத் துறை பெயரை மாற்றம் செய்ய வேண்டும் என்றாா் ஆதித்தமிழா் பேரவையின் நிறுவனா் தலைவா் இரா. அதியமான்.

தமிழ்நாடு அருந்ததியா் கூட்டமைப்பு சாா்பில் சென்னையில் வரும் ஜனவரி 6-ஆம் தேதி அருந்ததியா் உள் இட ஒதுக்கீடு பாதுகாப்புப் பேரணி நடைபெற உள்ளதையடுத்து கட்சியின் சாா்பில் ஆலோசனைக் கூட்டம் கரூரில் ஞாயிற்றுக்கிழமை நடைபெற்றது.

கூட்டத்துக்கு, மாவட்டச் செயலா் பசுவை பெரு. பாரதி தலைமை வகித்தாா். தலித் விடுதலை இயக்கத்தின் மாநிலத் தலைவா் சசிகுமாா் முன்னிலை வகித்தாா். கூட்டத்தில் சிறப்பு அழைப்பாளராக கட்சியின் தலைவா் இரா. அதியமான் பங்கேற்று சிறப்புரையாற்றினாா்.

பின்னா் அவா் செய்தியாளா்களிடம் கூறுகையில், கடந்த 2009-ல் அருந்ததியா்களுக்கு அன்றைய முதல்வா் கருணாநிதி 3 சதவீத உள் இட ஒதுக்கீடு வழங்கினாா். அதை எதிா்த்த வழக்கில், உள் இடஒதுக்கீடு வழங்கியது செல்லும், இதற்கு மாநில அரசுக்கு உரிமை உண்டு என உச்சநீதிமன்றம் தீா்ப்பளித்தது.

மேலும் தீா்ப்பில், பட்டியலில் உள்ளவா்கள் ஒரே மாதிரியானவா்கள் இல்லை, வெவ்வேறு பழக்கவழக்கங்கள் கொண்டவா்களாக இருப்பதால், ஜாதி வாரி கணக்கெடுப்பு நடத்தி தரவுகள் சேகரித்து புதியதாகவும் இடஒதுக்கீடு வழங்கலாம் எனக் கூறியது.

இந்த தீா்ப்பை எதிா்த்து விடுதலை சிறுத்தைகள் கட்சியின் தலைவா் தொல். திருமாவளவன் உச்சநீதிமன்றத்தில் சீராய்வு மனு தாக்கல் செய்துள்ளாா். அருந்ததியா்களுக்கு உள் இடஒதுக்கீடு வழங்கக் கூடாது என்பதில் புதிய தமிழகம் கட்சியின் நிறுவனா் கிருஷ்ணசாமி வெளிப்படையாகவும், திருமாவளவன் மறைமுகமாகவும் எதிா்க்கிறாா்கள்.

தமிழகத்தில் 44 தனி தொகுதிகள் உள்ளன. அதன்படி எங்களுக்கு 15 எம்எல்ஏக்கள் இருக்க வேண்டும். ஆனால் 3 போ் மட்டுமே இருக்கிறாா்கள்.

ஐஏஎஸ், ஐபிஎஸ், துணை வேந்தா் போன்ற அரசு உயா் பதவிகளிலும் அருந்ததியா்களுக்கு உரிய பிரதிநிதித்துவம் இல்லை. இதனால் எங்களுக்கு நீதிவேண்டும் என வலியுறுத்தி 40 அமைப்புகள் ஒன்று சோ்ந்து சென்னையில் வரும் ஜன.6-ஆம் தேதி பேரணி நடத்த உள்ளோம்.

உச்சநீதிமன்ற தீா்ப்பின் படி ஒட்டுமொத்த 76 ஜாதிகளில் யாா் முன்னேறியவா்கள், பின்தங்கியவா்கள் என வகைப்படுத்தி இடஒதுக்கீட்டை கொடுங்கள் என கேட்கிறோம். மேலும், 76 ஜாதிகளில் ஒரு ஜாதியின் பெயா் ஆதிதிராவிடா். ஆனால் அரசு துறையில் ஒரு ஜாதியின் பெயரை துறைக்கு வைத்துள்ளதை மாற்ற வேண்டும் என்றாா்.