இங்கிலாந்து டி20 கேப்டனாகிறார் ஹாரி புரூக்!

இங்கிலாந்து கிரிக்கெட் அணியின் டி20 கேப்டனாக இளம் வீரர் ஹாரி புரூக் நியமிக்கப்படவிருப்பதாகத் தகவல்கள் வெளியாகியிருக்கின்றன. மேலும், ஒருநாள் அணியின் கேப்டனாக பென் ஸ்டோக்ஸ் நியமிக்கப்படவுள்ளார்.

இந்தியா - இங்கிலாந்து அணிகள் மோதிய ஒருநாள், டி20 தொடர்களில் டி 20 தொடரை 1-4 என்றும், ஒருநாள் தொடரை முழுமையாகவும் இங்கிலாந்து அணி இழந்தது. இதனால், தனது கேப்டன் பதவியை ராஜிநாமா செய்வதாக ஜோஸ் பட்லர் தெரிவித்து சாம்பியன்ஸ் டிராபிக்கு பிறகு அணியிலிருந்து விலகினார். சாம்பியன்ஸ் டிராபி தொடரிலும் இங்கிலாந்து அணி 3 போட்டிகளில் விளையாடி 3-லும் தோல்வியைத் தழுவியது.

இதையும் படிக்க: ஒரே ஓவரில் இரண்டு கைகளில் பந்துவீசிய கமிந்து மெண்டிஸ்! விக்கெட்டும் வீழ்த்தினார்!

இதனால், டி20 அணியின் கேப்டனாக இளம் வீரர் ஹாரி புரூக் விரைவில் நியமிக்கப்படலாம் என்று இங்கிலாந்து கிரிக்கெட் அணியின் நிர்வாக இயக்குநர் ராப் கீ தெரிவித்திருக்கிறார்.

26 வயதான ஹாரி புரூக் கடந்தாண்டு செப்டம்பரில் நடைபெற்ற ஆஸ்திரேலியாவுக்கு எதிரான 5 போட்டிகள் கொண்ட ஒருநாள் தொடரில் தலைமைத் தாங்கியிருந்தார். மேலும், இந்தியா - இலங்கையில் அடுத்தாண்டு நடைபெறும் டி20 உலகக் கோப்பைக்கு அவர் இங்கிலாந்து அணியை வழிநடத்துவார் என்று எதிர்பார்க்கப்படுகிறது.

முன்னதாக, ஜெட்டா நகரில் நடைபெற்ற மெகா ஏலத்தில் ஹாரி புரூக்கை, தில்லி கேப்பிடல்ஸ் அணி ரூ.6.25 கோடிக்கு எடுத்தது. இருப்பினும், ஐபிஎல் தொடரில் இருந்து புரூக் பாதியில் விலகினார். இதனால், அவர் ஐபிஎல்லில் விளையாட 2 ஆண்டுகள் தடைவிதிக்கப்பட்டுள்ளது.

இதையும் படிக்க: டிராவிஸ் ஹெட் ஆட்டமிழப்புக்கு கூச்சலிட்ட கொல்கத்தா..! 125 டெசிபலுக்கு ஒலித்த சப்தம்!