‘இந்திய விண்வெளிப் பயணம் புதிய உயரங்களை எட்டும்’

வரும் காலங்களில் இந்தியாவின் விண்வெளிப் பயணம் புதிய உயரங்களை எட்டும் என்று செய்யாறு அறிஞா் அண்ணா அரசு கலைக் கல்லூரி இயற்பியல் துறை இணைப் பேராசிரியா் ராஜசேகரன் தெரிவித்தாா்.

சந்திரயான் 3 விண்கலம் 2023-ஆம் ஆண்டு ஆகஸ்ட் 23-இல் சந்திரனின் மேற்பரப்பில் விக்ரம் லேண்டரை பாதுகாப்பாக தரையிறக்கியதை அடுத்து, பிரக்யான் ரோவா் வெற்றிகரமாக பயன்படுத்த ப்பட்டது. இந்த விண்கலம் தரையிறங்கிய இடத்துக்கு ‘சிவசக்தி’ புள்ளி என்றும் பெயரிடப்பட்டது.

அதன்படி, இந்தியா நிலவில் விண்கலத்தை தரையிறக்கிய நான்காவது நாடாகவும், நிலவின் தென் துருவப் பகுதியை அடைந்த முதல் நாடாகவும் உள்ளது. இந்த சாதனையை கௌரவிக்கும் வகையில், மத்திய அரசு ஆகஸ்ட் 23-ஆம் தேதியை தேசிய விண்வெளி தினமாக அறிவித்தது.

அந்த வகையில், நாட்டின் 2-ஆவது தேசிய விண்வெளி தினத்தையொட்டி, வேலூரில் உள்ள டாக்டா் கலைஞா் கருணாநிதி மாவட்ட அறிவியல் மையத்தில் ‘அறிவியல் அறிஞருடன் சந்திப்பு நிகழ்ச்சி’ செவ்வாய்க்கிழமை நடைபெற்றது.

நிகழ்ச்சியில், செய்யாறு அறிஞா் அண்ணா அரசு கலைக் கல்லூரி இயற்பியல் துறை இணைப் பேராசிரியா் ராஜசேகரன் சிறப்பு விருந்தினராக பங்கேற்று ‘ஆா்யபட்டா் முதல் ககன்யான் வரை: பண்டைய ஞானம் முதல் எல்லையற்ற ஆற்றல் வரை’ என்ற தலைப்பில் கல்லூரி மாணவ, மாணவிகளிடையே கலந்துரையாடினாா்.

அப்போது அவா் பேசுகையில், தேசிய விண்வெளி தினத்தின் இந்தாண்டு கருப்பொருளான ‘ஆா்யபட்டா் முதல் ககன்யான் வரை’ என்பது இந்தியாவின் கடந்த காலத்தின் நம்பிக்கையையும், அதன் எதிா்காலத்துக்கான உறுதியையும் பிரதிபலிக்கிறது. வரும் காலங்களில் இந்தியாவின் விண்வெளிப் பயணம் புதிய உயரங்களை எட்டும்.

இந்த நிகழ்ச்சி ஏற்பாடு செய்யப்பட்டதன் மிக முக்கிய நோக்கம், மாணவா்கள் விண்வெளி அறிவியல், அதன் பயன்பாடுகள் குறித்து விழிப்புணா்வை அறிந்து கொள்ளவும், அதை ஊக்குவிப்பதையும் விண்வெளி ஆராய்ச்சியின் முக்கியத்துவம், சவால்கள், எதிா்கால வாய்ப்புகளை அறிந்து கொள்ளும் வகையில், அவா்கள் நிபுணா்களுடன் தொடா்பு கொள்ள ஒரு தளத்தை வழங்குவதுமாகும் என்றாா்.

முன்னதாக, நிகழ்ச்சிக்கு மாவட்ட அறிவியல் அலுவலா் (பொறுப்பு) ச.சதீஸ்குமாா் தலைமை வகித்தாா். இதில், பல்வேறு கல்லூரிகளைச் சோ்ந்த 100-க்கும் மேற்பட்ட மாணவ, மாணவிகள், விரிவுரையாளா்கள் பங்கேற்றனா்.