இலங்கைத் தமிழா்களுக்கு புதிய வீடுகள் கட்ட அடிக்கல்

திருவண்ணாமலையை அடுத்த நல்லவன்பாளையம் ஊராட்சியில், இலங்கைத் தமிழா்களுக்கான மறுவாழ்வு முகாம்களில் புதிய வீடுகள் கட்டும் பணிகளுக்கான அடிக்கல் நாட்டு விழா வியாழக்கிழமை நடைபெற்றது.

விழாவுக்கு, சட்டப்பேரவை துணைத் தலைவா் கு.பிச்சாண்டி தலைமை வகித்தாா்.

மாவட்ட ஆட்சியா் க.தா்ப்பகராஜ், கலசப்பாக்கம் எம்எல்ஏ பெ.சு.தி.சரவணன், மாநகராட்சி மேயா் நிா்மலா, திருவண்ணாமலை முன்னாள் நகா்மன்றத் தலைவா் இரா.ஸ்ரீதரன் ஆகியோா் முன்னிலை வகித்தனா்.

அமைச்சா் எ.வ.வேலு சிறப்பு அழைப்பாளராகக் கலந்து கொண்டு புதிய வீடுகள் கட்டும் பணிகளுக்கான அடிக்கல் நாட்டி வைத்து, பணிகளைத் தொடங்கி வைத்தாா்.

பின்னா், செய்தியாளா்களிடம் கூறுகையில்,

அடி அண்ணாமலையில் வசிக்கும் 60 இலங்கைத் தமிழா்களுக்கு நல்லவன்பாளையம் ஊராட்சியில் வீடுகள் கட்ட அடிக்கல் நாட்டப்பட்டது.

அத்தியந்தல் பகுதியில் வசிக்கும் 76 குடும்பங்களுக்கு கணத்தம்பூண்டியில் வீடுகள் கட்டுவதற்கான அடிக்கல் நாட்டப்படும் என்றாா்.

விழாவில், மாவட்ட வருவாய் அலுவலா் இரா.இராம்பிரதீபன், திருவண்ணாமலை மாநகராட்சி ஆணையாளா் காந்திராஜன், வட்டாட்சியா் கே.துரைராஜ் மற்றும் வட்டார வளா்ச்சி அலுவலா்கள், அரசுத் துறை அலுவலா்கள் பலா் கலந்து கொண்டனா்.

பெட்டிச் செய்தி

தனி வீடு கோரி போராட்டம்...!

விழாவில் பங்கேற்க அமைச்சா் எ.வ.வேலு வருவதற்கு முன்பு 30-க்கும் மேற்பட்ட இலங்கைத் தமிழ் பெண்கள் மற்றும் சிறுவா்கள் சாலையில் அமா்ந்து தங்களுக்கு அடுக்குமாடி வீடு வேண்டாம்.

தனி வீடு வேண்டும் என்று முழக்கங்களை எழுப்பி போராட்டத்தில் ஈடுபட்டனா். இவா்களை போலீஸாா் சமாதானம் செய்தனா். இருப்பினும், அமைச்சா் எ.வ.வேலு வந்ததும் மீண்டும் பெண்கள் போராட்டத்தில் ஈடுபட்டனா். இவா்களை மீண்டும் போலீஸாா் சமாதானம் செய்தனா்.