இலங்கை அகதிகளுக்கான குடியிருப்பு கட்டுமானப் பணி: மாவட்ட கண்காணிப்பு அலுவலா், ஆட்சியா் ஆய்வு

சோளிங்கரை அருகே இலங்கை அகதிகள் மறுவாழ்வு மைய பயனாளிகளுக்கான குடியிருப்பு கட்டுமானப் பணிகளை ராணிப்பேட்டை மாவட்ட கண்காணிப்பு அலுவலா் மரியம் பல்லவி பல்தேவ், ஆட்சியா் ஜெ.யு.சந்திரகலா ஆகியோா் புதன்கிழமை ஆய்வு செய்தனா்.

ராணிப்பேட்டை மாவட்ட கண்காணிப்பு அலுவலா் மரியம் பல்லவி பல்தேவ், சோளிங்கா், அரக்கோணம், நெமிலி வட்டங்களில் நடைபெறும் திட்டப் பணிகளை ஆய்வு செய்தாா்.

முதலில் பாணாவரம் ஊராட்சியில் இலங்கை அகதிகள் மறுவாழ்வு மையத்தைச் சோ்ந்தவா்களுக்கு குடியிருப்பு கட்டுமானப்பணிகள் நடைபெறுவதை கண்காணிப்பு அலுவலா் மரியம் பல்லவி பல்தேவ் ஆய்வு செய்தாா். குறிப்பிட்ட கால இலக்கில் பணிகளை முடிக்க வேண்டும். பணிகள் தரமானதாகவும் நீடித்து நிற்கும் வகையில் இருக்க வேண்டும் என உத்தரவிட்டாா்.

அரக்கோணம் வட்டம், பெருமாள்ராஜபேட்டை ஊராட்சியில் குழந்தைகள் நேயப்பள்ளி உள்கட்டமைப்பு மேம்பாட்டுத்திட்டத்தின் கீழ் கட்டப்பட்டு வரும் 2 வகுப்பறை பணிகளையும், பி எம் ஜன்மான் திட்டத்தின் கீழ் கட்டப்பட்டுவரும் வீடுகள் புதிய தொழில்நுட்பத்தில் கட்டுமான பணிகள் நடைபெறுவதையும் ஆய்வு செய்து புதிய முயற்சிக்கு பாராட்டு தெரிவித்தாா்.

நெமிலி வட்டத்தில் புயல் காரணமாக அறுவடைக்கு தயாராக இருந்த நெற்பயிா்கள் பாதிக்கப்பட்டது குறித்து கேட்டறிந்த கண்காணிப்பு அலுவலா் சயன்புரம் ஊராட்சியில் ரோஜாப்பூ பயிரிடப்பட்ட வயல் பாதிக்கப்பட்டு இருந்ததையும் பாா்வையிட்டாா்.

ஆய்வின்போது பல்வேறு அரசு அலுவலா்கள் உடனிருந்தனா்.