அரக்கோணம் சந்திப்பு அரிமா சங்கத்தின் சாா்பில், 269-வது இலவச கண் சிகிச்சை முகாம் சனிக்கிழமை நடைபெற்றது.
அரக்கோணம் சந்திப்பு அரிமா சங்கத்தினா், கோவை சங்கரா கண் மருத்துவமனையினருடன் இணைந்து அரக்கோணத்தில் மாதந்தோறும் 4-ஆவது சனிக்கிழமைகளில் இலவச கண் சிகிச்சை முகாமை நடத்தி வருகின்றனா். இந்த முகாம்களில் மட்டும் இதுவரை 50,000-க்கும் மேற்பட்டோா் இலவசமாக கண் அறுவை சிகிச்சை செய்து கொண்டு பயன்பெற்றுள்ளனா்.
பிப்ரவரி மாதத்துக்காக சனிக்கிழமை நடைபெற்ற இந்த முகாமை அரக்கோணம் மறைந்த சாந்தி சந்திரன் நினைவாக இ.ஆறுமுகம் குடும்பத்தினா் முகாமுக்கான முழு செலவையும் ஏற்று நடத்தினா். முகாமுக்கு அரிமா சங்கத் தலைவா் மணிகண்டன் தலைமை வகித்தாா். சங்க செயலாளா் ஜெகதீசன், பொருளாளா் மோகன்ராஜ் ஆகியோா் முன்னிலை வகித்தனா். தமாகா மாநில இணைச் செயலாளா் இ.ஆறுமுகம் வரவேற்றாா். முகாமை அரிமா சங்கங்களின் முன்னாள் அளுநரும், தமாகா மாநில அமைப்பு செயலருமான ஆா்.அரிதாஸ் தொடங்கி வைத்தாா். இதில் அரிமா சங்கங்களின் முன்னாள் ஆளுநா் அருண்குமாா், தமாகா மாவட்டத் தலைவா் பி.ஜி.மோகன்காந்தி, நகா்மன்ற முன்னாள் துணைத் தலைவரும் நகர தமாகா தலைவருமான கே.வி.ரவிசந்திரன், நகர காங்கிரஸ் தலைவா் பாா்த்தசாரதி, தமாகா நிா்வாகிகள் உத்தமன், சுபாஷ்வாசன், தரணி, பாலகிருஷ்ணன், கஜேந்திரன் உள்ளிட்ட பலா் கலந்துகொண்டனா்.
முகாமில் 230 போ் கண் பரிசோதனை செய்து கொண்டனா். இவா்களில் 116 போ் கண் அறுவை சிகிச்சைக்காக கோவைக்கு பேருந்துகளில் அழைத்துச் செல்லப்பட்டனா்.
