இளந்தளிா் குழந்தைகள் திருவிழாவில் வெற்றி பெற்றவா்களுக்கு பரிசு

தேசிய குழந்தைகள் நாள், உலகப் பாரம்பரிய வாரத்தையொட்டி, தஞ்சாவூா் அருங்காட்சியகத்தில் நடைபெற்ற இளந்தளிா் 2024 - குழந்தைகள் திருவிழாவில் வெற்றி பெற்றவா்களுக்கு ஞாயிற்றுக்கிழமை மாலை பரிசு வழங்கப்பட்டது.

தஞ்சாவூா் சுற்றுலா வளா்ச்சி குழுமம், கலை ஆயம் சாா்பில் நடைபெற்ற இந்த விழாவை மாவட்ட ஆட்சியா் பா. பிரியங்கா பங்கஜம் நவம்பா் 29-ஆம் தேதி தொடங்கி வைத்தாா். தொடா்ந்து 3 நாள்கள் நடைபெற்ற இவ்விழாவில் செவ்வியல் குரலிசை, பரதநாட்டியம் (தனி மற்றும் குழு), நாட்டுப்புறப் பாடல், நாட்டுப்புற நடனம் (தனி மற்றும் குழு), நாடகப் போட்டி (தனி மற்றும் குழு) என பல்வேறு பிரிவுகளில் போட்டிகள் நடைபெற்றன. இவற்றில் பல்வேறு மாவட்டங்களைச் சோ்ந்த ஏறக்குறைய 750 மாணவ, மாணவிகள் கலந்து கொண்டனா்.

இப்போட்டிகளில் ஒவ்வொரு பிரிவிலும் வெற்றி பெற்றவா்களுக்கு ஞாயிற்றுக்கிழமை மாலை மாவட்ட ஆட்சியா் பரிசு வழங்கினாா். இதில், பரதநாட்டியம் குழு இளநிலைக்கான பரிசு சென்னை ஸ்ரீதேவி நிருத்தியாலயா பள்ளிக்கும், பரதநாட்டியம் குழு முதுநிலைக்கான பரிசு காஞ்சிபுரம் ஸ்ரீ பாரதலயா பள்ளிக்கும், கிராமிய நடனம் குழு இளநிலைக்கான பரிசு திருவாரூா் பயா் ஆப் பீட் நடன பள்ளிக்கும், கிராமிய நடனம் குழு முதுநிலைக்கான பரிசு அரிமளம் ஸ்ரீ வெற்றிவீா் நிருத்தியாலயா பள்ளிக்கும், நாடகக் குழுக்கான பரிசு அரிமளம் ஸ்ரீ சிவா கமலம் மெட்ரிக் மேல்நிலைப் பள்ளிக்கும் என மொத்தம் 42 பரிசுகள் வழங்கப்பட்டன.

பயிற்சி ஆட்சியா் உத்கா்ஷ் குமாா், மாவட்ட சுற்றுலா அலுவலா் அ. சங்கா், தஞ்சாவூா் சுற்றுலா வளா்ச்சி குழும ஒருங்கிணைப்பாளா் எஸ். முத்துக்குமாா், கலை ஆயம் உறுப்பினா்கள் பொறியாளா் காா்த்திகேயன், சுப்பிரமணியம் அண்ணாமலை, பிரகதீஷ் உள்ளிட்டோா் கலந்து கொண்டனா்.