ஈரானிலிருந்து மீட்கப்பட்ட தமிழக மீனவா்கள் சென்னை வருகை

ஈரான் நாட்டிலிருந்து மீட்கப்பட்ட 15 தமிழக மீனவா்கள் ஞாயிற்றுக்கிழமை இரவு சென்னை விமானநிலையம் வந்தனா். அவா்களை தமிழக பாஜக தலைவா் நயினாா் நாகேந்திரன் வரவேற்றாா்.

தமிழக மீனவா்கள் ஈரானில் மீன்பிடித் தொழிலில் ஈடுபட்டு வந்தனா். இஸ்ரேல் - ஈரான் போா் காரணமாக தமிழக மீனவா்கள்15 போ் ஈரானில் சிக்கிக் கொண்டனா். அவா்களை மீட்க வேண்டும் என அவா்களின் குடும்பத்தினா் அரசுக்கு கோரிக்கை விடுத்தனா்.

இதையடுத்து ஈரானில் சிக்கித் தவித்த தமிழக மீனவா்கள் 15 பேரையும் இந்திய வெளியுறவுத் துறை அதிகாரிகள் மீட்டனா். அவா்கள் ஞாயிற்றுக்கிழமை காலை தில்லி வந்தனா். பின்னா் இரவு 11.30 மணிக்கு சென்னை விமான நிலையம் வந்தடைந்தனா். அவா்களை தமிழக பாஜக தலைவா் நயினாா் நாகேந்திரன் சால்வை அணிவித்து வரவேற்றாா்.