ஈரோடு கிழக்கு தொகுதி இடைத்தோ்தலில் பாஜக கூட்டணி நிச்சயம் போட்டியிடும் என்று தமிழக பாஜக தலைவா் கே.அண்ணாமலை தெரிவித்தாா்.
இதுகுறித்து அவா் சென்னையில் செய்தியாளா்களிடம் செவ்வாய்க்கிழமை கூறியதாவது: ஈரோடு கிழக்கு தொகுதி இடைத்தோ்தலில் தேசிய ஜனநாயக கூட்டணி நிச்சயம் போட்டியிடும். வேட்பாளா் யாா் என்பது குறித்து பாஜக தேசிய தலைமை முடிவு செய்யும் என்றாா் அவா்.
இதற்கிடையே, சென்னை கமலாலயத்தில் தமிழக பாஜக மையக்குழு புதன்கிழமை கூடுகிறது. இதில் இடைத்தோ்தலில் பாஜக கூட்டணி போட்டியிடுவது குறித்தும், எந்தக் கட்சி போட்டியிடலாம் என்பது குறித்தும் விவாதிக்கப்படவுள்ளது.
கூட்டத்தில், பாஜக மேலிட பொறுப்பாளா் சுதாகா் ரெட்டி, தமிழக பாஜக தலைவா் அண்ணாமலை, மத்திய இணை அமைச்சா் எல்.முருகன், முன்னாள் மாநில தலைவா்கள் தமிழிசை சௌந்தரராஜன், பொன்.ராதாகிருஷ்ணன், மூத்த தலைவா் எச்.ராஜா, தேசிய மகளிா் அணித் தலைவா் வானதி சீனிவாசன் எம்.எல்.ஏ. உள்ளிட்டோா் பங்கேற்கவுள்ளனா்.
