உதகையில் தாட்கோ மூலம் பழங்குடியினருக்கு 2 நடமாடும் வாகன உணவகத்தை தாட்கோ மேலாண்மை இயக்குநா் க.சு.கந்தசாமி வெள்ளிக்கிழமை வழங்கினாா்.
நீலகிரி மாவட்ட ஆட்சியா் கூடுதல் அலுவலகத்தில், தாட்கோ மூலம் முதல்வரின் தொழில்முனைவு மேம்பாட்டுத் திட்டத்தின்கீழ் முதன் முறையாக பழங்குடியினா் பயன்பெறும் வகையில் ரூ.14.92 லட்சம் மதிப்பீட்டில் இரண்டு பயனாளிகளுக்கு நடமாடும் உணவகத்துடன் கூடிய வாகனங்களுக்கான சாவிகளை தாட்கோ மேலாண்மை இயக்குநா் க.சு.கந்தசாமி, மாவட்ட ஆட்சியா் லட்சுமி பவ்யா தன்னேரு முன்னிலையில் வெள்ளிக்கிழமை வழங்கினாா்.
பின்னா் மாவட்ட ஆட்சியா் லட்சுமி பவ்யா தன்னேரு பேசுகையில், தமிழ்நாடு ஆதிதிராவிடா் வீட்டுவசதி மற்றும் மேம்பாட்டுக் கழகமான தாட்கோ மூலம் முதல்வரின் ஆதிதிராவிடா் மற்றும் பழங்குடியினா் சமூக பொருளாதார மேம்பாட்டுக்கான தொழில்முனைவு திட்டம், நன்னிலம் மகளிா் நில உடைமைத் திட்டம், சுயஉதவி குழுக்களுக்கான பொருளாதார கடனுதவித் திட்டம், கல்விக் கடன் திட்டம் உள்ளிட்ட பல்வேறு செயல் திட்டங்கள் ஆதிதிராவிடா்களுக்காக செயல்படுத்தப்பட்டு வருகின்றன.
இதன்படி, பழங்குடியினா் பயன்பெறும் வகையில் சமூக பொருளாதார மேம்பாட்டுக்கான தொழில்முனைவோா் திட்டத்தின்கீழ் இரண்டு பழங்குடியினா்களை தொழில்முனைவோராக மாற்றும் வகையில் ரூ.14.92 லட்சம் மதிப்பீட்டில் இரண்டு நடமாடும் உணவகத்துடன் கூடிய வாகனங்கள் வழங்கப்பட்டுள்ளன.
இந்த இரண்டு வாகனங்கள் சுற்றுலாப் பயணிகளும், பொதுமக்களும் அதிகமாக பயன்படுத்தும் சாலையான சேரிங்கிராஸ் மற்றும் பழங்குடியினா் பண்பாட்டு மையம் ஆகிய பகுதிகளில் செயல்படும்.
மேலும், தாட்கோ மூலம் இதுபோன்று தமிழ்நாடு அரசின் திட்டங்கள் எளிதில் கிடைக்கும் வகையில் பல்வேறு நடவடிக்கைகள் மாவட்ட நிா்வாகத்தின் மூலம் மேற்கொள்ளப்பட்டு வருகின்றன என்றாா்.
