‘ஓரணியில் தமிழ்நாடு’: அரியலூரில் திமுக பொதுக்கூட்டம்

அரியலூா் அண்ணாசிலை அருகே மாவட்ட திமுக சாா்பில் புதன்கிழமை ஓரணியில் தமிழ்நாடு பொதுக் கூட்டம் நடைபெற்றது.

கூட்டத்தில் போக்குவரத்து மற்றும் மின்சாரத் துறை அமைச்சா் சா.சி.சிவசங்கா் பேசியதாவது: ஓரணியில் தமிழ்நாடு பரப்புரைக்கான மையக் கருத்தாக தமிழக முதல்வா் மு.க. ஸ்டாலின் சொல்லி இருப்பது மண்ணை காக்க, மொழியை காக்க, நாம் பாடுபட வேண்டும் என்பதற்காகதான். எனவே, நாம் அனைவரும் ஓரணியில் இணைய வேண்டும். இந்த முன்னெடுப்பை ஒவ்வொரு கிராமங்களிலும் திமுக அரசின் சாதனைகள் மற்றும் பாஜக தமிழகத்தில் காலூன்றினால் ஏற்படும் பாதிப்புகள் குறித்து கட்சியினா் மக்களிடம் எடுத்துக் கூற வேண்டும் என்றாா்.

கூட்டத்துக்கு, அக்கட்சியின் சட்ட திட்ட திருத்தக் குழு இணைச் செயலா் சுபா.சந்திரசேகா் தலைமை வகித்தாா். தலைமைக் கழகப் பேச்சாளா் காவேரிப்பட்டினம் இளையராஜா கலந்து கொண்டு திமுக ஆட்சியில் செய்த சாதனைகளை எடுத்துக் கூறினாா்.

ஜெயங்கொண்டம் சட்டப் பேரவை உறுப்பினா் க.சொ.க.கண்ணன், தலைமை செயற்குழு உறுப்பினா் எம்.பி. பாலசுப்பிரமணியன், முன்னாள் சட்டப் பேரவை உறுப்பினா் து. அமரமூா்த்தி ஆகியோா் முன்னிலை வகித்து பேசினா். கூட்டத்தில், நகரச் செயலா்கள் அரியலூா் இரா. முருகேசன், ஜெயங்கொண்டம் வெ.கொ.கருணாநிதி மற்றும் ஒன்றிய, நகர கிளை நிா்வாகிகள் உள்ளிட்டோா் கலந்து கொண்டனா்.

முன்னதாக மாவட்ட துணைச் செயலா் மு.கணேசன் வரவேற்றாா். முடிவில் துணைச் செயலா் சி.சந்திரசேகரன் நன்றி கூறினாா்.