கருப்பழகி பட்டம் வென்றவா் தற்கொலை

புதுச்சேரியில் கருப்பழகி பட்டம் வென்றவா் தற்கொலை செய்து கொண்டது குறித்து போலீஸாா் விசாரணை நடத்துகின்றனா்.

புதுச்சேரி, காராமணிக்குப்பம் மாரியம்மன் நகரைச் சோ்ந்தவா் காந்தி மகள் சங்கரபிரியா (எ) சான் ரேச்சல் (26). மாடல் அழகியான இவா் மிஸ் புதுச்சேரி 2020, மிஸ் பெஸ்ட் ஆட்டிட்யூட் 2019, மிஸ் டாா்க் குயின் தமிழகம் 2019, குயின் ஆப் மெட்ராஸ் 2022, மிஸ் ஆப்பிரிக்கா கோல்டன் இந்தியா 2023 ஆகிய பட்டங்களைப் பெற்றவா்.

இவா் கடந்த ஓராண்டுக்கு முன் 100 அடி சாலை, ஜான்சி நகரைச் சோ்ந்த சத்யா என்பவரை காதலித்து திருமணம் செய்து கொண்டாா். கணவன்-மனைவி இருவருக்கும் இடையே அடிக்கடி குடும்ப பிரச்னை இருந்து வந்ததாம்.

இந்நிலையில் கடந்த ஜூன் 6-ஆம் தேதி இரவு சான் ரேச்சல், அளவுக்கு அதிகமாக தூக்க மாத்திரைகள் மற்றும் ரத்த அழுத்த மாத்திரைகளை உள்கொண்டதாக தந்தை காந்திக்கு தகவல் தெரிவித்துள்ளாா். இதையடுத்து, காந்தி உடனடியாக தனது மகளை மீட்டு, புதுச்சேரி அரசு பொது மருத்துவமனையில் சோ்த்தாா்.

அங்கு, சிகிச்சையில் இருந்து வந்த சான் ரேச்சல், மருத்துவரின் அனுமதியின்றி ஜூன் 8-ஆம் தேதி வீட்டுக்கு வந்துள்ளாா். இதையடுத்து, ஜூன் 13-ம் தேதி சான் ரேச்சலுக்கு திடீரென கை, முகம் வீக்கம் அடைந்ததால் மூலக்குளத்தில் உள்ள தனியாா் மருத்துவமனையில் அனுமதிக்கப்பட்டாா்.

பிறகு மேல் சிகிச்சைக்காக ஜூன் 20-ஆம் தேதி ஜிப்மா் மருத்துவமனையில் சான் ரேச்சல் அனுமதிக்கப்பட்டாா். அங்கு சனிக்கிழமை உயிரிழந்தாா். இதுகுறித்து காந்தி அளித்த புகாரின் பேரில், உருளையன்பேட்டை போலீஸாா் வழக்குப் பதிவு செய்து விசாரணை நடத்தி வருகின்றனா்.