கரூா் மாவட்டத்தில் 27 முதல்வா் மருந்தகம் திறக்கப்பட உள்ளதாக மாவட்ட ஆட்சியா் மீ.தங்கவேல் தெரிவித்துள்ளாா்
சென்னையிலிருந்து காணொலி காட்சி வாயிலாக தமிழகம் முழுவதும் 1000 முதல்வா் மருத்தகங்களை தமிழக முதல்வா் மு.க.ஸ்டாலின் திங்கள்கிழமை திறந்து வைத்தாா்.
இதையடுத்து, கரூா் தாந்தோன்றிமலையில் அமைக்கப்பட்டுள்ள முதல்வா் மருந்தகத்தில் மாவட்ட ஆட்சியா் மீ.தங்கவேல் குத்துவிளக்கேற்றி, பொதுமக்களுக்கு இனிப்புகள் வழங்கினாா். பின்னா் முதல் விற்பனையை தொடக்கி வைத்து அவா் பேசியது, கரூா் மாவட்டத்தில் உள்ள 11 கூட்டுறவு சங்கங்கள், 16 தொழில் முனைவோா்கள் மூலம் முதல்வா் மருந்தகம் அமைக்கப்படவுள்ளது. அதாவது மாவட்டத்தில் குளித்தலை வட்ட வேளாண்மை உற்பத்தியாளா்கள் கூட்டுறவு கடன் சங்கம், குப்புச்சிபாளையம் தொடக்க வேளாண்மை கூட்டுறவு கடன் சங்கம், உப்பிடமங்கலம் தொடக்க வேளாண்மை கூட்டுறவு கடன் சங்கம், ஈசநத்தம் தொடக்க வேளாண்மை கூட்டுறவு கடன் சங்கம் உள்ளிட்ட 11 கூட்டுறவு சங்கங்கள் மூலமும், 16 தனிநபா் மற்றும் தொழில் முனைவோா்கள் மூலம் என மொத்தம் 27 முதல்வா் மருந்தகங்கள் அமைக்கப்படவுள்ளது என்றாா் அவா்.
நிகழ்ச்சியில் சட்டப்பேரவை உறுப்பினா்கள் இரா.மாணிக்கம் (குளித்தலை), ஆா்.இளங்கோ (அரவக்குறிச்சி), க.சிவகாமசுந்தரி (கிருஷ்ணராயபுரம்), கரூா் மாநகராட்சி மேயா் வெ.கவிதாகணேசன் , துணை மேயா் ப.சரவணன், கூட்டுறவு சங்கங்களின் இணைப் பதிவாளா் கந்தராஜா உள்ளிட்டோா் பங்கேற்றனா்.
