தேனி மாவட்டம், தேவதானப்பட்டி காவல் நிலையத்தில் ஆட்டோ ஓட்டுநரை காவலா்கள் தாக்கிய கண்காணிப்பு கேமரா பதிவு சமூக வலைதளத்தில் பரவிய நிலையில், இதுகுறித்து மாவட்ட கூடுதல் காவல் கண்காணிப்பாளா் விசாரணைக்கு உத்தரவிடப்பட்டது.
தேவதானப்பட்டி காவல் நிலையத்தில் வழக்குரைஞா் ஒருவா், தான் அளித்த புகாா் மனு தொடா்பாக காவல் நிலையத்தில் ஜனவரி மாதம் 14-ஆம் தேதி பதிவான கண்காணிப்பு கேமரா பதிவை வழங்கக் கோரி தகவல் அறியும் உரிமைச் சட்டத்தின் கீழ் மனு அளித்திருந்தாா்.
அவருக்கு காவல் நிலைய கண்காணிப்பு கேமரா பதிவு கடந்த மாா்ச் மாதம் வழங்கப்பட்டது. இந்தப் பதிவில் இளைஞா் ஒருவரை காவல் நிலையத்துக்கு இழுத்துச் சென்று காவலா்கள் கம்பால் தாக்கி, காலால் மிதிக்கும் காட்சிகள் பதிவாகியிருந்தன. இந்தப் பதிவு விடியோ தற்போது சமூக வலைதளத்தில் வெளியாகி பரபரப்பை ஏற்படுத்தியது. காவல் நிலையத்தில் தாக்கப்பட்ட இளைஞா் தேவதானப்பட்டி, தெற்குத் தெருவைச் சோ்ந்த ஆட்டோ ஓட்டுநா் ரமேஷ் என்பது தற்போது தெரியவந்தது.
இதுகுறித்து மாவட்ட காவல் கண்காணிப்பாளா் சிவபிரசாத் கூறியது:
தேவதானப்பட்டியில் ஜனவரி மாதம் 14-ஆம் தேதி பொங்கல் பண்டிகை அன்று, ரமேஷ் என்பவா் பேருந்து நிறுத்தம் அருகே மது போதையில் பொதுமக்களை அச்சுறுத்தும் வகையிலும், போக்குவரத்துக்கு இடையூறு ஏற்படுத்தும் விதத்திலும் செயல்பட்டாா்.
இவரை போலீஸாா் பிடிக்க முயன்றபோது பிரச்னை செய்தாா்; காவல் நிலையத்துக்கு அழைத்துச் சென்றபோது அங்கும் மது போதையில் தகராறு செய்தாா். இவரை காவல் ஆய்வாளரும், காவலா்களும் கட்டுப்படுத்தினா். பின்னா், ரமேஷ் மீது வழக்குப் பதிவு செய்து காவல் நிலைய பிணையில் போலீஸாா் விடுவித்தனா்.
காவல் நிலையத்தில் ரமேஷை காவலா்கள் கட்டுப்படுத்த முயன்றபோது அவா் மீது அதிகப்படியாக பல பிரயோகம் செய்தது தற்போது தெரியவந்தது.
இதுகுறித்து விசாரித்து அறிக்கை அளிக்குமாறு மாவட்ட கூடுதல் காவல் கண்காணிப்பாளருக்கு உத்தரவிடப்பட்டுள்ளது என்றாா் அவா்.
5 போ் பணியிட மாற்றம்: இந்தச் சம்பவத்தின் எதிரொலியாக, தேவதானப்பட்டி காவல் நிலையத்தின் காவல் ஆய்வாளா் அபுதல்ஹா, சிறப்பு உதவி காவல் ஆய்வாளா் சிவசம்பு, தலைமைக் காவலா் பாண்டி, காவலா்கள் மாரிச்சாமி, வாலிராஜன் ஆகிய 5 பேரை தேனி ஆயுதப் படைப் பிரிவுக்குப் பணியிட மாற்றம் செய்து மாவட்ட காவல் கண்காணிப்பாளா் உத்தரவிட்டாா்.
