கும்பமேளாவில் உயிரிழந்தவர்களில் 5 மத்தியப் பிரதேச பக்தர்கள்!

உத்தரப் பிரதேசத்தின் பிரயாக்ராஜில் நடந்துவரும் மகா கும்பமேளாவில் மௌனி அமாவாசை புனித நீராடலின்போது ஏற்பட்ட நெரிசலில் சிக்கி உயிரிழந்த 30 பேரில் ஐந்து பேர் மத்தியப் பிரதேசத்தைச் சேர்ந்தவர்கள் என அடையாளம் காணப்பட்டுள்ளதாக முதல்வர் மோகன் யாதவ் தெரிவித்தார்.

திரிவேணி சங்கமத்தில் அகாடா துறவிகள் புனித நீராடுவதற்கான இடத்தில் காவல்துறையின் தடுப்புகளை அத்துமீறிய பக்தர்களால் கூட்ட நெரிசல் ஏற்பட்டது. இந்த நெரிசலில் சிக்கி 30 பேர் உயிரிழந்த நிலையில், பலர் படுகாயமடைந்தனர்.

ஜப்பானில் நான்கு நாள் சுற்றுப்பணத்தில் உள்ளார் முதல்வர் மோகன் யாதவ். கும்பமேளா தொடர்பாக அவர் வெளியிட்ட எக்ஸ் பதிவில்,

பிரயாக்ராஜ் மகா கும்பமேளாவில் நடந்த வேதனையான சம்பவத்தில் மத்தியப் பிரதேசத்தைச் சேர்ந்த ஐந்து பக்தர்களின் மரணம் உறுதி செய்யப்பட்டுள்ளது.

ஐந்து பக்தர்களின் மரணம் மிகுந்த வேதனையளிக்கின்றது. இறந்தவர்கள் ஒவ்வொருவரின் குடும்பத்துக்கும் வழங்கப்படும் நிதியுதவியை ரூ. 2 லட்சத்திலிருந்து ரூ.4 லட்சமாக உயர்த்துமாறு உத்தரவிடுகிறேன்.

இந்த துயரமான நேரத்தில், துயரமடைந்த குடும்பங்களுக்கு தேவையான அனைத்து உதவிகளையும் வழங்க எங்கள் அரசு உறுதி பூண்டுள்ளது என்று அவர் பதிவில் தெரிவித்தார்.

மத்தியப் பிரதேசத்தைச் சேர்ந்த இரண்டு பேர் ஒரு பெண் மற்றும் ஆண் என அடையாளம் காணப்பட்ட நிலையில், ஹுகும் பாய் லோதி என்ற பெண் சத்தர்பூர் மாவட்டத்தைச் சேர்ந்தவர் என்றும், அந்த நபர் ரைசன் மாவட்டத்தைச் சேர்ந்த மோகன்லால் அஹிர்வார் என்றும் அடையாளம் காணப்பட்டதாகவும் அதிகாரிகள் தெரிவித்தனர்.

முதல்வர் ஐந்து பேர் இறந்ததை உறுதிப்படுத்தியிருந்தாலும், மேலும் மூன்று பேர் பற்றிய விவரங்கள் போபாலில் உள்ள அதிகாரிகளிடம் இன்னும் கிடைக்கவில்லை.