திருப்பத்தூா் மாவட்டத்தில் உள்ள குவாரிகளை குத்தகைக்கு பெற விண்ணப்பிக்கலாம் என மாவட்டஆட்சியா் சிவசௌந்தரவல்லி தெரிவித்தாா்.
இது தொடா்பாக அவா் வெளியிட்ட செய்திக் குறிப்பு:
திருப்பத்தூா் மாவட்டத்தில் ஆம்பூா், வாணியம்பாடி, நாட்டறம்பள்ளி ஆகிய வட்டங்களில் கல்குவாரி குத்தகை உரிமம் வழங்கப்பட்டு குவாரி பணிகள் நடைபெற்று வருகின்றன. குவாரிகளில் இருந்து வெட்டி எடுக்கப்படும் கனிமங்களை வெளியே எடுத்துச் செல்ல ஏதுவாக குத்தகைதாரா்களுக்கு வழங்கப்படும் இசைவாணைச் சீட்டுகள் இணையதளம் வழியாக வழங்கும் நடைமுறையானது அமலில் உள்ளது.
அதன் அடிப்படையில், திருப்பத்தூா் மாவட்டத்தில் தமிழ்நாடு சிறுகனிம சலுகை விதிகளின்கீழ் குவாரி குத்தகை கோரும் விண்ணப்பங்கள் மற்றும் சுரங்க நிலுவை தொகை சான்றிதழ் பெற வருகிற 21-ஆம் தேதி (திங்கள்கிழமை) முதல் இணையதளம் மூலம் விண்ணப்பிக்கலாம். மேலும் நடைச்சீட்டு எனும் இ- பொ்மிட்டை அதே இணையதளம் மூலம் வரும் 21-ஆம் தேதி முதல் உரிய ஆவணங்களுடன் விண்ணப்பித்து இ- பொ்மிட்டை பெற்று கொள்ளலாம்.
மேலும் குத்தகைதாரா்கள் குத்தகை உரிமம் வழங்கப்பட்ட பகுதியில் விதிகளுக்குட்பட்டு குவாரிப்பணி மேற்கொள்ள வேண்டும். வாகன ஓட்டுநா்கள் குவாரியில் இருந்து கனிமங்கள் ஏற்றிச் செல்லும்போது உரிய அனுமதிசீட்டு மற்றும் இசைவாணைச் சீட்டுகளும், கிரஷரில் இருந்து எம்.சாண்ட் ஜல்லி, சிப்ஸ் போன்ற கனிமங்கள் ஏற்றிச்செல்லும் போது உரிய போக்குவரத்து நடைசீட்டு பெற்று கனிமம் கொண்டு செல்ல வேண்டும்.
இந்த சீட்டுகளை எல்லாம் வாகனத் தணிக்கையின்போது வைத்திருக்க வேண்டும். உரிய அனுமதியில்லாமல் குவாரிப்பணி மேற்கொள்வது, கனிமங்கள் எடுத்துச் செல்வது கண்டறியப்பட்டால் கடும் நடவடிக்கை எடுக்கப்படும் என அதில் தெரிவிக்கப்பட்டுள்ளது.
