"கூடங்குளம், கல்பாக்கம் மின் பகிர்வு விவகாரத்தில் புரிந்துணர்வுடன் ஒருமித்த கருத்து நிலவுகிறது'

நமது சிறப்பு நிருபர்

கூடங்குளம், கல்பாக்கம் மின்சாரத்தை உற்பத்தி செய்யும் மாநிலத்துக்கே வழங்கக் கோரும் விவகாரத்தில், கூட்டாட்சி புரிந்துணர்வின்படியே மத்திய, மாநில அரசுகள் ஒருமித்த கருத்துடன் செயல்பட்டு வருவதாக பிரதமர் அலுவலக இணை அமைச்சர் ஜிதேந்திர சிங் தெரிவித்துள்ளார்.

இது தொடர்பாக மக்களவையில் புதன்கிழமை கேள்வி நேரத்தின்போது பேசிய மயிலாடுதுறை தொகுதி காங்கிரஸ் உறுப்பினர் ஆர். சுதா, "கூடங்குளம், கல்பாக்கம் மின்னுற்பத்தி நிலையங்களில் தயாரிக்கப்படும் மின்சாரத்தை உற்பத்தி மாநிலங்களே அவற்றின் தேவைக்கு பயன்படுத்தும் வகையில் மின் பகிர்வு அதிகரிக்கப்படுமா என்று கேள்வி எழுப்பினார். அப்போது பிரதமர் நரேந்திர மோடி அவையில் இருந்ததால் அவரிடமே பதிலை எதிர்பார்ப்பதாக எம்.பி. சுதா தெரிவித்தார்.

இருப்பினும், பிரதமர் அலுவலக இணை அமைச்சர் ஜிதேந்திர சிங் எழுந்து, "மின்னுற்பத்தி நிலையங்களின் மின்சார பகிர்வு குறித்து அணுசக்தித் துறை மட்டுமின்றி சம்பந்தப்பட்ட மின்துறை, புதிய மற்றும் புதுப்பிக்கதக்க எரிசக்தித் துறை அமைச்சகம் ஆகியவை மிக விரிவாக விவாதித்துள்ளன. ஆரம்பத்தில் காட்கில் திட்டத்தின்படி மின்னுற்பத்தி செய்யும் மாநிலத்துக்கு 15 முதல 20 சதவீதம் வரை மின்சாரத்தை பகிரலாம் என்றிருந்தது. அது தற்போது 50 சதவீதமாக அதிகரிக்கப்பட்டுள்ளது. மீதமுள்ள 35 சதவீதத்தை அண்டை மாநிலங்களுக்கும் மீதமுள்ள ஒதுக்கப்படாத 15 சதவீதம் மின்பாதைக்கும் செல்கிறது. இந்த விஷயத்தில் மாநிலங்களுக்கும் யூனியன் பிரதேச அரசுகளுக்கும் இடையே ஒருமித்த கருத்து எட்டப்பட்டுள்ளது. கூட்டாட்சி உணர்வின்படி அது சரியானதும் கூட' என்றார்.

இதைத் தொடர்ந்து, மின்னுற்பத்தி தொடர்பான சுதாவின் துணைக் கேள்விக்கு பதிலளித்த அமைச்சர், "2014-இல் பிரதமர் மோடி தலைமையில் அரசு அமைந்தபோது நாட்டின் மொத்த மின்சார உற்பத்தி ஆற்றல் 4,780 மெகா வாட்டாக இருந்தது. இப்போது அது இரட்டிப்பாகி 8,180 மெகா வாட் ஆகியுள்ளது. இதே நிலை தொடர்ந்தால் 2031-32-இல் நமது மின்னுற்பத்தி திறன் மும்மடங்கு பெரும்,' என்றார்.