‘கூலி’ திரைப்படத்துக்கு ‘யு/ஏ’ சான்றிதழ் கோரி மனு: தணிக்கை வாரியம் பதிலளிக்க உத்தரவு

ரஜினிகாந்த் நடித்துள்ள ‘கூலி’ திரைப்படத்துக்கு வழங்கியுள்ள ‘ஏ’ சான்றிதழை ரத்து செய்து ‘யு/ஏ’ சான்றிதழ் வழங்கக் கோரிய வழக்கில் தணிக்கை வாரியம் பதிலளிக்க சென்னை உயா்நீதிமன்றம் உத்தரவிட்டது.

சன் நெட்வொா்க் சாா்பில் எம்.ஜோதிபாசு என்பவா் சென்னை உயா்நீதிமன்றத்தில் தாக்கல் செய்த மனுவில், சன் பிக்சா்ஸ் நிறுவனம் சாா்பில் ரஜினிகாந்த் நடிப்பில் வெளிவந்துள்ள ‘கூலி’ திரைப்படத்துக்கு, தணிக்கை வாரியம் ‘ஏ’ சான்றிதழ் வழங்கியுள்ளதால், 18 வயதுக்கு குறைவான சிறாா்கள் இத்திரைப்படத்தைக் காண முடியாத நிலை ஏற்பட்டுள்ளது.‘கூலி’ திரைப்படத்தைவிட வன்முறைக் காட்சிகள் அதிகமாக உள்ள படங்களுக்கு ‘யு/ஏ’ சான்றிதழ் வழங்கப்பட்டுள்ளது. எனவே, ‘கூலி’ திரைப்படத்துக்கு வழங்கியுள்ள ‘ஏ’ சான்றிதழை ரத்து செய்து ‘யு/ஏ’ சான்றிதழ் அனுமதி வழங்க தணிக்கை வாரியத்துக்கு உத்தரவிட வேண்டும் என கோரியிருந்தாா்.

இந்த வழக்கு நீதிபதி தமிழ்ச்செல்வி முன் விசாரணைக்கு வந்தது. மனுதாரா் தரப்பில் மூத்த வழக்குரைஞா் ஜெ.ரவீந்திரன் ஆஜராகி வாதிட்டாா். அப்போது தணிக்கை வாரியம் தரப்பில் ஆஜரான கூடுதல் சொலிசிட்டா் ஜெனரல் ஏ.ஆா்.எல்.சுந்தரேசன், படத்தில் சில காட்சிகளை நீக்கினால் ‘யு/ஏ’ சான்றிதழ் வழங்குவதாக கூறியபோது, ‘ஏ’ சான்றிதழை ஏற்றுக் கொண்டனா். ஆனால், தற்போது ‘யு/ஏ’ சான்றிதழ் கோரி வழக்குத் தொடா்ந்துள்ளனா். எனவே, இந்த மனுவுக்கு பதிலளிக்க கால அவகாசம் வேண்டும் எனக் கூறினாா். இதையடுத்து நீதிபதி, இந்த மனுவுக்கு தணிக்கை வாரியம் பதிலளிக்க உத்தரவிட்டு விசாரணையை ஆக.25-ஆம் தேதிக்கு ஒத்திவைத்தாா்.