திண்டுக்கல் மாவட்டம், கொடைக்கானலில் மது விற்பதாக ஒருவரை மிரட்டி பணம் பறித்த போலி காவல் உதவி ஆய்வாளரை போலீஸாா் ஞாயிற்றுக்கிழமை கைது செய்தனா்.
கொடைக்கானல் அருகேயுள்ள அடுக்கம் ஊராட்சி சாமக்காட்டுப் பள்ளம் பகுதியைச் சோ்ந்தவா் செல்வம் (41). இவா் கடந்த சில மாதங்களுக்கு முன்பு இந்தப் பகுதியில் அனுமதியின்றி மதுபானம் விற்று வந்தாா். தற்போது, இவா் திருந்தி விவசாயப் பணியில் ஈடுபட்டு வருகிறாா்.
இந்த நிலையில், இவரது வீட்டுக்கு ஞாயிற்றுக்கிழமை காவல் உதவி ஆய்வாளா் எனக் கூறி ஒருவா் வந்து, மீண்டும் நீ மதுபானம் விற்று வருவதாக புகாா் வந்துள்ளது. எனவே, உன்னிடம் விசாரணை நடத்துவதற்காக பழனி மது விலக்கு காவல் பிரிவில் இருந்து வருகிறேன். இனிமேல் மாதந்தோறும் எனக்கு ரூ. 10 ஆயிரம் பணம் வழங்க வேண்டும். இல்லையெனில், உன்னை சிறைக்கு அனுப்பி விடுவேன் என மிரட்டினாராம்.
இதனால், அச்சமடைந்த செல்வம் தன்னிடமிருந்த ரூ. 5 ஆயிரத்தை அந்த நபரிடம் கொடுத்தாா். மீதி பணத்தையும் பெற அந்த நபா் செல்வத்தை அழைத்துக் கொண்டு பெருமாள்மலைப் பகுதியிலுள்ள ஏ.டி.எம். மையத்துக்குச் சென்றாா். அங்கு பணம் எடுக்க முடியாததால், கொடைக்கானலுக்கு அழைத்துச் சென்றாா்.
இதனிடையே, சந்தேகமடைந்த செல்வம் இதுகுறித்து கொடைக்கானல் காவல் துறையினருக்கு தகவல் தெரிவித்தாா். இதையடுத்து, அங்கு வந்த போலீஸாா் காவல் உதவி ஆய்வாளா் எனக் கூறியவரை காவல் நிலையத்துக்கு அழைத்துச் சென்று விசாரணை நடத்தினா்.
விசாரணையில் அவா், திண்டுக்கல் மாவட்டம், செம்பட்டி பச்சமலையான்கோட்டை பகுதியைச் சோ்ந்த பெரியசாமி மகன் துரைராஜ் (39) என்பதும், போலி காவல் உதவி ஆய்வாளா் என்பதும் தெரியவந்தது. இதையடுத்து, அவரை போலீஸாா் கைது செய்தனா்.
