கொல்லிமலை புளியஞ்சோலை ஆற்றில் நீா்வரத்து அதிகரிப்பு! சுற்றுலாப் பயணிகளுக்கு கட்டுப்பாடு விதிக்க கோரிக்கை!

கொல்லிமலை அடிவாரப் பகுதியான புளியஞ்சோலை ஆற்றில் நீா்வரத்து அதிகரித்து காணப்படும் நிலையில், ஆபத்தை உணராமல் சுற்றுலாப் பயணிகள் குளித்து வருகின்றனா். இதனை வனத் துறையினா் தடுக்க வேண்டும் என அப் பகுதியில் வசிக்கும் பழங்குடியின மக்கள் வலியுறுத்தி உள்ளனா்.

தமிழகத்தின் முக்கிய சுற்றுலாத் தலங்களில் ஒன்று நாமக்கல் மாவட்டத்தில் அமைந்துள்ள கொல்லிமலை. இங்குள்ள ஆகாய கங்கை அருவி, நம் அருவி, மாசிலா அருவி மற்றும் முக்கிய சுற்றுலாத் தலங்களைக் காண பல்வேறு மாநிலங்கள், மாவட்டங்களில் இருந்து ஏராளமானோா் வருகின்றனா்.

சனி, ஞாயிற்றுக்கிழமை, பண்டிகை நாள்களில் வழக்கத்தைக் காட்டிலும் சுற்றுலாப் பயணிகள் வருகை அதிகரித்திருக்கும். தற்போது மாா்கழி மாதம் என்பதால் கொல்லிமலை பகுதியில் கடும் குளிா் காணப்படுகிறது. அதிகாலைகளில் சாலைகளை மறைக்கும் அளவில் பனிமூட்டம் உள்ளது.

நாமக்கல், சேலம் பகுதிகளில் இருந்து கொல்லிமலைக்கு வருவோா் காரவள்ளி அடிவாரம் வழியாக 70 கொண்டை ஊசி வளைவுகளை கடந்தும், ராசிபுரம், ஆத்தூா் பகுதியில் இருந்து வருவோா் முள்ளுக்குறிச்சி, செங்கரை வழியாகவும், திருச்சி, துறையூா் பகுதிகளில் இருந்து வருவோா் புளியஞ்சோலை வழியாகவும் கொல்லிமலையை வந்தடைகின்றனா்.

ஆகாய கங்கை அருவியில் இருந்து வெளியேறும் நீா் புளியஞ்சோலை பகுதியில் ஆறாக ஓடுகிறது. சுற்றுலாப் பயணிகள் இந்த ஆற்றில் குளித்து மகிழ்கின்றனா். இங்கு சில நேரங்களில் எதிா்பாராதவிதமாக சிலா் நீரில் மூழ்கி பலியாகும் சம்பவங்களும் நடைபெறுகின்றன. தற்போது ஆற்றில் நீா்வரத்து அதிகரித்து காணப்படுகிறது. அதனை பொருட்படுத்தாமலும், ஆபத்தை உணராமலும் சுற்றுலாப் பயணிகள் குளித்து வருகின்றனா்.

வனத் துறையினா் சம்பந்தப்பட்ட பகுதியில் நேரடியாக ஆய்வு செய்து மக்களுக்கு கட்டுப்பாடுகளை விதிக்க வேண்டும். ஆழமான பகுதிகளைக் கண்டறிந்து அங்கு யாரும் செல்லாதவாறு விழிப்புணா்வு பலகைகளை வைக்க வேண்டும் என கொல்லிமலை பகுதி மக்கள் வலியுறுத்துகின்றனா்.

செந்நாய்களைப் பிடிக்க வனத் துறை தீவிரம்

கொல்லிமலையில் குண்டூா் நாடு, ஆரியூா் நாடு, நத்துக்குழிப்பட்டி, குழிவளவு போன்ற இடங்களில் 29 ஆடுகளை மா்ம விலங்கு கடித்து கொன்றுள்ளது. சிறுத்தை, கரடி என கூறினாலும் செந்நாய்களால் ஆடுகள் கொல்லப்பட்டிருக்கலாம் என வனத் துறையினா் சந்தேகிக்கின்றனா்.

இது தொடா்பாக உயிரிழந்த ஆடுகளின் உடல் உறுப்புகளை ஆய்வுக்கு அனுப்பி உள்ளனா். ஓரிரு நாள்களில் அந்த அறிக்கை கிடைக்கக்கூடும். அப்போது தான் ஆடுகளை கொன்ற மா்ம விலங்கு எனது என்பது தெரியவரும். நத்துக்குழிப்பட்டியில் உள்ள மாசி பெரியசாமி கோயிலுக்கு வரும் பக்தா்கள் கிடா வெட்டி சுவாமிக்கு படையலிடுகின்றனா்.

அவா்கள் ஆட்டிறைச்சியை மலைப்பகுதியில் வீசிவிட்டு செல்வதால், அதனை மோப்பம் பிடித்து வரும் செந்நாய்கள் ஊருக்குள் புகுந்து பட்டியில் உள்ள ஆடுகளை கடித்து கொன்று வருவதாகவும், இதனை கண்டறிய முக்கிய இடங்களில் கண்காணிப்பு கேமராக்கள் பொருத்தப்பட்டுள்ளதாகவும், கொல்லிமலை வரும் சுற்றுலாப் பயணிகள் இரவு நேரங்களில் அடா்ந்த காட்டுக்குள் செல்வதை தவிா்க்க வேண்டும் எனவும் வனத் துறையினா் அறிவுறுத்தி உள்ளனா்.