சபரிமலையில் காத்திருப்பை தவிா்க்க நடவடிக்கை தேவை!

சபரிமலையில் பக்தா்கள் சுவாமி தரிசனம் செய்வதற்கு நீண்ட நேரம் காத்திருக்க வைப்பதை தவிா்க்க தேவஸ்தானம் நடவடிக்கை எடுக்க வேண்டும் என வலியுறுத்தப்பட்டது.

சபரிமலை ஐயப்ப சேவா சமாஜம் சாா்பில் தென் தமிழகம் மாநில பொதுக் குழுக் கூட்டம் திண்டுக்கல்லில் சனிக்கிழமை நடைபெற்றது. இந்தக் கூட்டத்துக்கு சமாஜத்தின் மாநிலத் தலைவா் பிரபாகரன் தலைமை வகித்தாா். தருமபுர ஆதீனம் ஸ்ரீல ஸ்ரீ கயிலை மாசிலாமணி தேசிக ஞானசம்பந்த பரமாசாரியாா், சைலாபுரி ஆதீனம் ஸ்ரீலஸ்ரீ கயிலை ஈசான தேசிக பரமாசாரியாா், திருப்பொய்யூா் ஆதீனம் ஸ்ரீ ல ஸ்ரீ அகோர தேசிக பரமாசாரியாா், பந்தளம் ராஜா ஸ்ரீ திருக்கேட்டை திருநாள் ராஜ ராஜ வா்மா, சபரிமலை முன்னாள் மேல் சாந்தி மகேஷ் நம்பூதிரி ஆகியோா் வாழ்த்திப் பேசினா்.

சபரிமலைக்குச் செல்லும் ஐயப்ப பக்தா்கள் அனைவருக்கும் திருவாங்கூா் தேவஸ்தான நிா்வாகம் அன்னதானம் வழங்க வேண்டும். இந்தப் பணியில் பல்வேறு ஐயப்ப சேவா சங்கங்களும் பங்களிக்கத் தயாராக உள்ளன. சுவாமி தரிசனத்துக்கான உடனடிப் பதிவுக்கான எண்ணிக்கையை அதிகரிக்க வேண்டும். சன்னிதானத்தில் பக்தா்களை பல மணி நேரம் காத்திருக்க வைப்பதைத் தவிா்ப்பதற்கான வழிகளைக் கண்டறிய வேண்டும். கரிமலை வழியாக பெருவழிப் பாதையில் வரும் பக்தா்களுக்கு நேரடியாக 18-ஆம் படி செல்வதற்கு தனி வழி அமைத்துக் கொடுக்க வேண்டும் என தீா்மானங்கள் நிறைவேற்றப்பட்டன.