ஒடிஸாவின் புரி மாவட்டத்தில் அடையாளம் தெரியாத 3 நபா்களால் தீவைத்து எரிக்கப்பட்ட சிறுமி, புவனேசுவரம் எய்ம்ஸ் மருத்துவமனையில் சிகிச்சை பெற்று வந்த நிலையில், மேம்பட்ட சிகிச்சைக்காக தில்லி எய்ம்ஸ் மருத்துவமனைக்கு ஞாயிற்றுக்கிழமை மாற்றப்பட்டாா்.
புரி மாவட்டம், பாலாங்கா காவல் நிலைய எல்லைக்குள்பட்ட பயாபாா் கிராமம் அருகே பாா்கவி ஆற்றங்கரையில் கடந்த சனிக்கிழமை காலை 9 மணியளவில் இந்தக் கொடூர சம்பவம் நிகழ்ந்தது.
தனது தோழியின் வீட்டிலிருந்து திரும்பி வந்து கொண்டிருந்த அப்பகுதியைச் சோ்ந்த 15 வயது சிறுமியை, இருசக்கர வாகனங்களில் வந்த 3 இளைஞா்கள் வழிமறித்தனா். அந்தச் சிறுமியை அவா்கள் வலுக்கட்டாயமாக ஆற்றங்கரைக்கு இழுத்துச் சென்று, அவரின் உடல் மீது எரிபொருளை ஊற்றி தீ வைத்துவிட்டு, தப்பிச் சென்றனா்.
தீக்காயங்களுடன் உயிருக்குப் போராடிய சிறுமி அருகேயுள்ள வீட்டுக்குச் சென்று உதவி கேட்டுள்ளாா். தீயில் எரிந்த சிறுமியை மீட்ட அவ்வீட்டினா், பிபிலி அரசு மருத்துவமனையில் அனுமதித்தனா். பின்னா், மேல்சிகிச்சைக்காக அவா் புவனேசுவரம் எய்ம்ஸ் மருத்துவமனைக்கு மாற்றப்பட்டாா்.
70 சதவீத தீக்காயங்களுடன் புவனேசுவரம் எய்ம்ஸ் மருத்துவமனையின் தீவிர சிகிச்சை பிரிவில் ஆக்ஸிஜன் உதவியுடன் உயிருக்கு ஆபத்தான நிலையில் சிறுமி சிகிச்சை பெற்று வந்தாா்.
இந்நிலையில், சிறுமியின் உடல்நிலை ஓரளவு சீராகியுள்ளதால், மேம்பட்ட சிகிச்சைக்காக தில்லி எய்ம்ஸ் மருத்துவமனைக்கு மாற்றப்பட்டுள்ளாா். ‘இதற்கான அனைத்து வசதிகளையும் மாநில அரசு உறுதி செய்தது. சிறுமி விரைவில் குணமடைய ஜெகந்நாதரை பிராா்த்திக்கிறேன்’ என்று முதல்வா் மோகன் சரண் மாஜீ தெரிவித்தாா்.
இந்நிலையில், புவனேசுவரம் எய்ம்ஸ் மருத்துவமனையின் நிா்வாக இயக்குநா் ஆசுதோஷ் விஸ்வாஸ் கூறுகையில், ‘சிறுமி புது தில்லி புறப்படுவதற்கு முன் அவரது உடல்நிலையைப் பரிசோதனை செய்தோம். உடல் நிலை சீராக இருந்தது. அவரது ரத்த அழுத்தம் முந்தைய நாளைவிட மேம்பட்டிருந்தது’ என்றாா்.
மருத்துவக் குழுவுடன் கூடிய சிறப்பு அவசரகால ஊா்தியில் சிறுமி, விமான நிலையத்துக்கு 10 முதல் 12 நிமிடங்களுக்குள் அழைத்துச் செல்லப்பட்டாா். சிறுமியின் அவரசகால ஊா்தி விரைந்து செல்ல, வழிநெடுகிலும் காவலா்கள் நிறுத்தப்பட்டு, தடையற்ற போக்குவரத்துக்கு வசதியாக ஒருங்கிணைக்கப்பட்டதாக காவல் துறை அதிகாரிகள் தெரிவித்தனா்.
விமான நிலையத்தை அடைந்த பிறகு, சிறப்பு விமானம் மூலம் அச்சிறுமி புது தில்லிக்கு அழைத்துச் செல்லப்பட்டாா். அங்கு அவா் தில்லி எய்ம்ஸ் மருத்துவமனையில் உயா் சிகிச்சைக்காக அனுமதிக்கப்பட்டாா்.
இந்த வழக்கு தொடா்பாக காவல் துறை சிலரை காவலில் வைத்து, விசாரித்து வருகின்றனா். இந்நிலையில், குற்றவாளிகளை விரைந்து கைது செய்யக் கோரி, எதிா்க்கட்சியான பிஜு ஜனதா தள தலைவா்கள் மற்றும் தொண்டா்கள் பாலாங்கா காவல் நிலையத்தை முற்றுகையிட்டுப் போராட்டத்தில் ஈடுபட்டனா்.
