சாலை வசதி கோரி அமைச்சரின் காரை முற்றுகையிட்ட பொதுமக்கள்

மேட்டூா் அருகே சாலை வசதி கோரி சுற்றுலாத் துறை அமைச்சரின் காரை முற்றுகையிட்டு பொதுமக்கள் கோரிக்கை மனு அளித்தனா்.

மேட்டூா் சரபங்க நீரேற்று திட்டத்தில் திப்பம்பட்டியில் உள்ள பிரதான நீரேற்று நிலையத்திலிருந்து மின் மோட்டாரை இயக்கி ஏரிகளுக்கு மேட்டூா் அணை உபரிநீரை திருப்பிவிட்ட தமிழக சுற்றுலாத் துறை அமைச்சா் ராஜேந்திரன், நங்கவள்ளி அருகே உள்ள வாத்திப்பட்டி ஏரிக்கு வரும் உபரிநீரை பாா்வையிடச் சென்றாா்.

சாணாரப்பட்டி ஊராட்சியில் உள்ள லெனின் நகரைச் சோ்ந்த 50க்கும் மேற்பட்டோா் அமைச்சரின் காரை முற்றுகையிட்டு தங்கள் பகுதியில் தாா் சாலை அமைக்க வேண்டும். நீண்ட நாள்கள் கோரிக்கை விடுத்தும் யாரும் நடவடிக்கை எடுக்கவில்லை என முறையிட்டனா்.

இதையடுத்து மாவட்ட ஆட்சியா் பிருந்தாதேவி, சேலம் மக்களவை உறுப்பினா் டி.எம்.செல்வகணபதி ஆகியோா் காரிலிருந்து இறங்கி வந்து தற்போது தான் தங்களின் கவனத்திற்கு வந்துள்ளது. இப் பகுதியில் சாலை அமைத்து தருகிறோம் என பொதுமக்களை சமரசம் செய்தனா்.

அதன்பிறகு பொதுமக்களின் கோரிக்கை மனுக்களைப் பெற்ற அமைச்சா் ராஜேந்திரன், அவா்களின் கோரிக்கைகளை கேட்டறிந்தாா். நபாா்டு திட்டத்தின் கீழ் சாலை அமைக்கப்படும் என அவா் உறுதியளித்தாா். இதையடுத்து பொதுமக்கள் அமைச்சருக்கு நன்றி தெரிவித்தனா்.